Тошкент тиббиёт академияси кўп тармоқли клиникасида 16 нафар бемор буткул соғайди ва 1 май куни Республика ихтисослаштирилган терапия ва тиббий реабилитация илмий-амалий тиббиёт марказига кузатилди. Бу ҳақда Соғлиқни сақлаш вазирлиги хабар берди.
Соғайганларнинг 8 нафари Тошкент шаҳридан, 3 нафари Тошкент вилоятидан, 2 нафари Наманган вилоятидан. Шунингдек, Сирдарё, Самарқанд ва Андижон вилоятларидан ҳам 1 нафардан фуқаро тузалган.
Уларнинг 6 нафари Россиядан Қозоғистон орқали Ўзбекистонга келган ва карантинга олинган. Касаллик аниқлангач, улар мазкур клиникага ётқизилган. Тузалганларнинг 10 нафари эса коронавирус инфекциясига чалинганлар билан мулоқотда бўлиб, касалликни юқтириб олган. Уларнинг 11 нафари эркак, 5 нафари аёл бўлиб, энг каттаси 81 ёшда, энг кичиги эса 12 ёшда.
Тошкент шаҳрида шу пайтга қадар коронавирус инфекциясидан соғайган беморлар сони 380 нафарга етди.
Шунингдек, Самарқанд вилоятида коронавирус инфекциясига чалинган 7 нафар бемор ҳам соғайиб, 1 май куни реабилитацияга кузатилди.
Тузалганларнинг барчаси Самарқанд вилоятидан бўлиб, улар коронавирус инфекциясига чалинганлар билан мулоқотда бўлиб, касалликни юқтириб олган. Улардан 3 нафари эркак, 4 нафари аёл. Уларнинг энг каттаси 70 ёшда, энг кичиги эса 4 ёшли бола.
Самарқанд вилоятида шу пайтга қадар COVID-19 касаллигидан соғайганлар сони 21 нафарга етди. Айни пайтга қадар Ўзбекистон бўйича коронавирусдан бутунлай тузалганлар сони 1182 нафарга етди.
Аввалроқ Қашқадарёда коронавирусга чалинган барча бемор соғайгани, Бухорода эса Қирғизистон фуқаролари коронавирусдан тузалгани ҳақида хабар берилганди.
Ўзбекистонда 1 май соат 15:00 ҳолатига кўра, коронавирус инфекциясини юқтириб олганлар сони 29 кишига кўпайиб, 2075 нафарга етди. Мамлакатда 15 мартдан буён коронавирусга чалинган беморларнинг тўққиз нафари вафот этди, шунингдек, 28 апрелдан буён соғайганлар сони айни вақтда касалликдан даволанаётганлар сонидан кўп бўлиб турибди.
Изоҳ (0)