Самарқанд вилояти ҳокимлиги Сирдарёнинг Сардоба туманида яшовчи аҳолига ёрдам бериш мақсадида махсус ёрдам гуруҳини юборди, дея хабар беради «Дарё» мухбири Фарҳод Норбўтаев.
Таъкидланишича, Самарқанд вилоят Фавқулодда вазиятлар бошқармаси бошлиғи, полковник Ўлмас Мелиев бошчилигидаги қутқарувчилар гуруҳи 33 та палатка, 2 та қайиқ ва бошқа зарур қутқарув воситаларини олиб, йўлга чиққан.
Самарқанд ҳокими ўринбосари Рустам Қобиловнинг «Дарё»га маълум қилишича, Сардоба тумани аҳолиси учун зарур озиқ-овқат, дори-дармон ва иссиқ кийим-кечак ҳам юборилган.
Эслатиб ўтамиз, 1 май куни соат 05:55 да Сирдарё вилоятида жойлашган «Сардоба» сув омбори дамбасининг 6-пикет деворида сув чиқиши юзага келган. Натижада Сардоба тумани Қўрғонтепа аҳоли яшаш пунктига сув кирган. Бунда, асосан, сув экин майдонларига зарар етказганлиги маълум бўлди.
Воқеа жойига дастлаб бош вазир Абдулла Арипов, сўнгра давлат раҳбари Шавкат Мирзиёев етиб боргани хабар берилди.
Изоҳ (0)