Кентукки губернатори Тупак Шакурдан кечирим сўради. Рэпернинг адаши ишсизлик нафақасига ариза берганида у буни ҳазил деб ўйлаганди

АҚШнинг Кентукки штати губернатори Энди Бэшер ишсизлик нафақасини олишга берилган аризалар аслида ишсиз бўлмаган фуқароларнинг ҳаракатлари сабаб кечикаётганидан нолиди, деб ёзади Meduza.

Бэшер шундай фуқаролардан бири ўзини Тупак Шакур деб таништирганини айтиб ўтган. Губернатор минглаб одамларни кутишга мажбурламаслик учун бундай қилмасликни тайинлади.

Бироқ маълум бўлишича, Тупак Шакур исмли шахс ҳақиқатан ҳам ариза берган ҳамда у таниқли рэпернинг адаши.

Шакур Кентуккининг Лексингтон шаҳрида яшайди. У аввал ошпаз бўлиб ишлаган, бироқ коронавирус пандемияси туфайли у ишсиз қолган.

Шакур сўнгги пулини тўловларга сарфлаган, шунинг учун ишсизлик нафақасига ариза берган эди. У аризасини ҳазил деб ўйлашларини хаёлига ҳам келтирмаганди. Бу янгилик уни ҳайратга солган.

Орадан бироз вақт ўтгач Кентукки губернатори Тупак Шакурнинг чиндан ҳам ишсизлигидан хабар топди, унга қўнғироқ қилиб узр сўради.

Шакур сиёсатчини кечирган ҳамда унинг қандай катта ҳажмдаги ишларни амалга оширишини тушунишини айтиб ўтган. «Хатолар бўлиб туради», — дейди Шакур.