Англиянинг Шимолий Йоркшир графлиги Йарм шаҳрида яшовчи аёлга чиқиндихона ходимлари у адашиб ташлаб юборган пул солинган конвертни излашга ёрдам берди, деб ёзади TeessideLive.
21 апрель куни Кейна Жексон 18 ёшга тўлди. Қизга ота-онаси карантин тугаганидан сўнг саёҳатга чиқиши учун 450 фунт стерлинг (560 доллар) совға қилди.
Туғилган кун соҳибаси эътиборсизлик қилиб, пул солинган конвертни ахлат челакка ташлаб юборди. Оила ушбу ҳолатдан хабар топганида кеч бўлган, пул ташлаб юборилган чиқинди олиб кетилган эди.
Қизнинг онаси Лиэнн Бест шаҳар кенгашига қўнғироқ қилиб ёрдам сўраган.
«Менга қўлларидан келганча ҳаракат қилишларини, бироқ ҳеч нарса ваъда қилмасликларини айтишди. Мен хаёлан пуллар билан хайрлашдим. Ўзимни бу шунчаки қоғоз эканлигига ишонтириб, тинчлантирдим», — дейди Лиэнн.
Воқеадан хабар топган маҳаллий чиқинди ташиш хизмати ходимлари қизга ёрдам беришга қарор қилди. Бир неча соатдан сўнг улар ташлаб юборилган конвертни топишга муваффақ бўлган. Ўша куни кечқурун ходимлар қизнинг уйига бориб, йўқолган совғани унга топширган. Оила ходимларни қарсаклар билан қарши олган.
«Улар пулни топиш учун тонналаб ахлатни титгани таҳсинга сазовор. Уларнинг меҳнатини қадрлаймиз», — дейди Бест.
Изоҳ (0)