Сирдарёда коронавирусга чалинган дастлабки 4 бемор соғайди. Ўзбекистонда тузалганлар сони 1059 кишига етди

Қорақалпоғистон Республикаси, Наманган, Хоразм ва Сирдарё вилоятларида 29 апрель куни жами 54 киши коронавирусдан тузалиб, реабилитацияга кузатилди. Ўзбекистонда коронавирус инфекциясидан буткул соғайганлар сони 1059 нафарга етди. Бу ҳақда Соғлиқни сақлаш вазирлиги хабар берди.

Қорақалпоғистон Республикаси юқумли касалликлар шифохонасида 29 апрель куни коронавирус инфекциясига чалинган 12 нафар бемор соғайди ва реабилитацияга кузатилди.

Соғайганларнинг барчаси Қорақалпоғистондан. Хусусан, 7 нафари Нукус шаҳридан, 3 нафари Қўнғирот туманидан, Мўйноқ ва Қонликўл туманларидан 1 нафардан. Уларнинг барчаси коронавирусга чалинганлар билан мулоқот орқали касалликни юқтириб олган. Беморларнинг 6 нафари эркак, 6 нафари аёл бўлиб, улар орасида энг каттаси 67 ёшда бўлса, энг кичиги 2018 йилда туғилган.

Айни пайтга қадар Қорақалпоғистонда 62 нафар бемор коронавирусда тўлиқ соғайган.

Шунингдек, 29 апрель куни Наманган вилоятида коронавирус инфекциясига чалинган яна 11 нафар бемор соғайиб, реабилитацияга кузатилди.

Тузалганларнинг барчаси Наманган вилоятидан (9 нафари Наманган шаҳридан, Учқўрғон ва Наманган туманларидан 1 нафардан) бўлиб, 2 нафари Туркиядан келган ва карантинга олинган. Уларда касаллик аниқлангач, шифохонага ётқизилган. Қолган 9 киши коронавирусга чалинганлар билан мулоқот орқали касалликни юқтириб олган. Беморларнинг 4 нафари эркак, 7 нафари аёл бўлиб, улар орасида энг каттаси 67 ёшда, энг кичиги эса 12 ёшда.

Наманган вилоятида шу пайтга қадар коронавирусдан тузалган беморлар сони 72 нафарни ташкил этмоқда.

Хоразм вилоятида эса коронавирус инфекциясига чалинган 27 нафар бемор 29 апрель куни бутунлай соғайди ва реабилитацияга кузатилди.

Соғайганларнинг барчаси жорий йилнинг 22 март куни Россиядан чартер рейс билан келган ва карантинга олинган. Уларда коронавирус инфекцияси тасдиқлангач, вилоят юқумли касалликлар шифохонасига жойлаштирилган.

Улардан 22 нафари эркак, 5 нафари аёллардир. Тузалганлар орасида Қашқадарё ва Бухоро вилоятларидан 5 нафардан, Жиззах ва Андижон вилоятларидан 3 нафардан, Қорақалпоғистон Республикаси, Самарқанд, Сурхондарё ва Фарғона вилоятларидан 2 нафардан, Тошкент, Наманган вилоятлари ва Тошкент шаҳридан 1 нафардан фуқаро бор. Улар орасида энг каттаси 50 ёшда бўлса, энг кичиги 20 ёшда.

Хоразм вилоятида айни пайтга қадар 121 нафар бемор коронавирусдан буткул соғайди.

Коронавирус инфекциясига чалинган беморлар тузалиб чиқаётган ҳудудлар сафига Сирдарё вилояти ҳам қўшилди. Ушбу вилоятда коронавирус инфекциясига чалинган дастлабки 4 нафар бемор тузалиб чиқди ва реабилитацияга олинди.

Сирдарёда соғайганларнинг барчаси эркак бўлиб, улар Фарғона, Қашқадарё, Сурхондарё ва Жиззах вилоятларида яшайди. Уларнинг 3 нафари Қозоғистондан келган ва карантинга олинган. Касаллик аниқлангач, улар шифохонага ётқизилган. Қолган 1 нафар бемор эса коронавирус инфекциясига чалинганлар билан мулоқотда бўлиб, касалликни юқтириб олган. Уларнинг энг каттаси 48 ёшда бўлса, энг кичиги 33 ёшда.

Аввалроқ Ўзбекистонда коронавирусдан тузалганлар сони 1000 нафардан ошгани ҳақида хабар берилган эди. 28 апрель куни Ўзбекистонда илк бор коронавирусдан соғайганлар сони айни вақтда коронавирус инфекциясидан даволанаётганлар сонидан ошиб кетди.

Ўзбекистонда 29 апрель соат 15:30 ҳолатига кўра, коронавирус инфекциясини юқтириб олганлар сони 14 кишига кўпайиб, 1969 нафарга етди. Ўзбекистонда 15 мартдан буён коронавирусга чалинган беморларнинг саккиз нафари вафот этган.