27 апрель, душанба кун, соат 09:30 ларда Сурхондарё вилояти Шўрчи туманида одам ўлими билан якунланган йўл-транспорт ҳодисаси содир бўлди. Бу ҳақда ЙҲХББ хабар берди.
Ҳодиса 4К-592 йўлининг 9-километрида юз берган. 1999 йилда туғилган М.Т. Nexia’ни бошқариб кетаётганида олдинда ҳаракатланаётган машинани қувиб ўтиш мақсадида йўлнинг қарама-қарши бўлагига чиққан вақтида қаршисидан ҳаракатланиб келаётган «Камаз-652043» русумли юк транспорт воситаси билан тўқнашиб, ЙТҲ содир этган.
Оқибатда Nexia йўловчиси 1993 йилда туғилган Ф.К. оғир тан жароҳати олиб воқеа жойида вафот этган. Ҳайдовчи М.Т. тан жароҳати олиб шифохонага ётқизилган.
Апрель ойининг тўртинчи ҳафтасида одам ўлими билан якунланган яна бир нечта ЙТҲ содир бўлди. 20 апрель куни Муборак туманида Spark ва «Зил» тўқнашуви оқибатида 32 ёшли Spark ҳайдовчиси, 21 апрель куни Бойсун туманида Nexia қўйларни ҳайдаб кетаётган чўпонни уриб кетиши оқибатида 28 ёшли чўпон, Чирчиқ шаҳрида Nexia-3 пиёдани уриб юбориши оқибатида 60 ёшли пиёда, 22 апрель куни Сариосиё туманида Captiva велосипедчини туртиб юбориб, сўнг деворга урилиши оқибатида 31 ёшли йўловчи, 23 апрель куни Конимех туманида Nexia-3 ағдарилиб кетиши оқибатида 24 ёшли ҳайдовчи, 24 апрель куни Қамчиқ довонида тормози ишламай қолган юк машинаси тоғга урилиши оқибатида 37 ёшли ҳайдовчи, 26 апрель куни юк машинаси пиёдани уриб юбориши оқибатида 20 ёшли қиз вафот этганди.
ЙҲХББ йўл ҳаракати иштирокчиларини карантин вақтида заруратсиз кўчага чиқмаслик, зарурат билан чиққанда ҳам «Йўл ҳаракати қоидалари»га амал қилишга чақирди.
Изоҳ (0)