Бухорога 27 апрель оқшомида кучли шамол ёпирилиб, вилоятнинг Қоракўл ва Олот туманларига айниқса жиддий талафот етказгани боис, Президент Шавкат Мирзиёев 28 апрель куни вилоятга ташриф буюрди. Қоракўл ва Олот туманларидаги вазиятни вертолётдан кузатиб, Олот тумани марказида ҳудуд фаоллари билан учрашди.
Учрашувда Олот туманидаги маҳаллалардан бирининг оқсоқоли сўзга чиқди ва туман аҳолисининг табиий офатдан кейинги кайфияти ҳақида гапира туриб, шундай деди: «Одамлар Когон воқеасини эслаяпти. Когонда аҳвол бундан-да ёмон бўлганида Шавкат Мирзиёев шу ерда ўтириб, қисқа вақтда янги Когонни қуриб берганди. Олотнинг ҳозирги аҳволи ўша Когон олдида ҳеч нарса эмас».
Оқосоқолнинг бу сўзларига муносабат билдираркан, Президент Когонда «ҳар куни ўлим билан курашиш»га тўғри келганини таъкидлади.
«Когонда бўлган воқеалар... Когонда биз ҳар куни ўлим билан курашгандик. Ўшанда ҳам эсон-омон чиқиб кетиб, йўқотишни камайтириб, янги Когон шаҳрини қуришни бошлаганмиз. Когоннинг шароитини ҳеч эслатиб бўлмайди. Илоҳим, у кунлар келмасин», — деди Президент Шавкат Мирзиёев Когон воқеасини эслаб.Қайд этиш жоиз, Президент Мирзиёев 2018 йил февралида Бухоронинг Пешку туманида бўлиб ўтган фаоллар йиғилишида ҳам Когонни яхши билишини эслатиб, «оғир пайтлари ўша ерда ўзи 72 кун ётганини» таъкидлаган эди.Эслатиб ўтамиз, 2008 йил 11 июлга ўтар кечаси Когонда жойлашган ҳарбий қисмнинг ракета-артиллерия омборхонасида ёнғин чиқиб, кейинчалик давомли портлашларга сабаб бўлган. Расмий маълумотларга кўра, ҳодиса оқибатида уч киши ҳалок бўлган, 21 киши тан жароҳати олган. Портлашлар оқибатида ўнлаб кўп қаватли уйлар зарар кўрган, бир неча бино тўлиқ ёниб кетган.
Воқеадан бир ҳафта ўтиб Когонга Биринчи Президент Ислом Каримов ташриф буюрган. Давлат раҳбари совет даврида қурилган қурол-аслаҳа омбори бундай объектлар учун белгиланган норматив талабларга жавоб бермаганини таъкидлаб, Мудофаа вазирлигини бу ердаги қурол-аслаҳаларнинг сақланишига етарлича эътибор қаратмагани учун танқид қилган эди.
Мавзуга доир: Ўзбекистон тарихидаги воқеа-ҳодисалар бўйича тест
Изоҳ (0)