Буюк Британия бош вазири Борис Жонсон шу ҳафта коронавирус пандемияси тарқалишининг олдини олиш бўйича жорий этилган карантин чоралари енгиллаштирилишини эълон қилиши кутилмоқда. Бу ҳақда ҳукумат раҳбарининг режаларидан бохабар манбасига таяниб, The Telegraph хабар берди.
Маълумотларга кўра, бош вазир 7 майга қадар мўлжалланган карантин чораларини енгиллаштириши мумкин.
«7 май бу — ҳукумат қонун бўйича карантин чораларини қайта кўриб чиқиши керак бўлган кун, бироқ Жонсон хоҳласа, чеклов чораларини муддатидан олдин ўзгартириши ёки ҳеч бўлмаганда нима қилмоқчилиги ҳақида олдиндан маълум қилиши мумкин», — дейди манба.
Таъкидланишича, 27 апрель куни Борис Жонсон ўзининг коронавирусга қарши кураш штаби билан касалхонадан чиққанидан кейинги илк учрашувини ўтказади. Бош вазир айрим чеклов чораларини муддатидан олдин бекор қилиш тарафдори, бироқ якуний қарор мутахассислар билан ўтказиладиган учрашувдан сўнг қабул қилинади.
Сўнгги маълумотларга кўра, Буюк Британияда коронавирус билан касалланганлар сони 154 минг кишидан, қурбонлар сони эса 20 минг кишидан ошган.
Аввалроқ Британия бош вазири ўз маслаҳатчилари билан учрашиб, мамлакатда коронавирусга қарши курашишда эришилган ютуқлар тўғрисида сўнгги маълумотларни олгани ҳақида хабар берилганди. Италия ҳам мамлакатда карантин чоралари енгиллаштирилиб, май ойидан музейлар ва Колизей очилишини маълум қилган.
Изоҳ (0)