Коронавирус пандемияси туфайли Россиядаги йирик банклар айрим ходимларни офисда яшаб ишлаш тартибига ўтказмоқда. Жумладан, «Совкомбанк» ва «Зенит» банки аллақачон ходимлар учун 24/7 шаклидаги тартибни жорий этган. Бу ҳақда «РБК» хабар берди.
«Совкомбанк» тахминан 10 нафар ходимни офисда ҳам яшаш, ҳам ишлаш тартибига ўтказган. Бу ҳақда кредит ташкилоти раисининг биринчи ўринбосари Сергей Хотимский маълум қилган. Ушбу ҳаракат банк операцияларининг ишончли ва узлуксизлигини таъминлайди.
«Ушбу тартиб банкнинг юраги ҳисобланган — ғазначилик операцияларига тааллуқли, узлуксиз ишлаши талаб этиладиган жараён ҳам шу. Ҳар кунлик ҳисоб-китобларга масъул бўлган асосий мутахассислар банкда яшамоқда: тўлиқ изоляция қилинади, шу ерда ухлайди, овқатланади ва чўмилади, пандемия якунига етмагунча яқин қариндошлари билан учрашмайди. Буни зарурий чора деб ҳисоблаймиз», — деган Хотимский.
У ходимлар ўз хоҳишига кўра бу тартибга ўтгани ва бу учун уларга устамалар тўланаётганини ҳам қайд этган.
«Зенит» банки ҳам алоҳида гуруҳдаги ходимларни мазкур режимга ўтказиш режасини тузган, бироқ амалга оширишни ҳали бошламаган. Бошқарув кенгаши раисининг биринчи ўринбосари Константин Рибаков банкда офислардаги фавқулодда ҳолатлар учун масъул ходимлардан иборат гуруҳлар таркиби шакллантирилганини билдирган.
«Режада гуруҳларнинг банкда яшаши ва ҳар томонлама рағбатлантирилиши кўзда тутилган. Бунинг учун озиқ-овқат маҳсулотлари харид қилинган, шунингдек, мутахассислар учун маиший буюмлар ҳам тақсимланган. Махсус мотивацион дастур ишлаб чиқилиб, бу борадаги маслаҳатлар ва ишлаш тартиби тушунтирилган. Бунга тиббиёт ходимлари ҳам бириктирилади», — дейди Рибаков.
Банк ходимларни изоляция қилишнинг шарт-шароитлари ҳақида тўхталган, аммо бошқа тафсилотларни ошкор этмаган. Банк раисининг биринчи ўринбосари махсус гуруҳлардаги ходимлар COVID-19 бўйича тест топширганини қайд этган.
Россиядаги ташкилот ва муассасаларнинг аксарияти ходимларининг кўп қисмини масофадан ишлашга ўтказган. Аммо уларда офисдан туриб ишлаш ва у ерда яшашга рухсат берилмаган. Жумладан, ВТБ, «Райффанзенбанк», «Росбанк», «Промсвязьбанк» ва «Тинькофф Банк»да бундай тартиб жорий этилмаган. Нашр хабарига кўра, мамлакатдаги топ-20 рейтингига кирувчи банклар қўнғироқларга жавоб бермаган.
Март ойларида кўплаб кредит ташкилотлари ҳам ходимларини масофадан ишлашга ўтказишни бошлаган. Шунингдек, банклар хориждан қайтган ходимларнинг офисларга келишини ҳам тақиқлаб қўйган. 16 мартда Россияда COVID-19 юқтириб олиш бўйича 93 та ҳолат кузатилганди.
25 мартда коронавирусга чалинганлар сони 163 тагача ўсди, Владимир Путин 30 мартдан 5 апрелгача ишланмайдиган ҳафта деб эълон қилган, ушбу чеклов банкларга нисбатан қўлланилмаганди. Аммо Москвада ва бошқа федерал ҳудудларда банкларнинг айримларида ходимлар масофадан ишлашга ўтказилган. Кейинчалик ишланмайдиган кунлар 30 апрелгача узайтирилгач, кредит ташкилотлари бўлинмалардаги иш тартиби ўзгаришини маълум қилган.
Изоҳ (0)