Европадаги биринчи коронавирус вакцинасини одамларда синаб кўриш Буюк Британияда бошланди, деб хабар бермоқда BBC News.
Тадқиқотда 800 дан ортиқ кўнгиллилар иштирок этади, айни пайтда уларнинг фақат икки нафари эмланган. Тажрибада иштирок этаётганларнинг ярми коронавирусга қарши, қолган ярми эса менингитга қарши вакцина олади. Бунда уларнинг ҳеч бири қайси вакцинани олганини билмайди. Бу имкон қадар ишончли натижаларга эришиш имконини беради.
Қайд этилишича, ушбу воситани Оксфорд университети олимлари атиги 3 ой аввал ишлаб чиққан. Ваксинология профессори Сара Гильберт ундан жуда катта натижаларни умид қилаётганини билдирган. «Албатта, ҳали уни одамларда синаб кўриб маълумот тўплашимиз керак. Биз, у ҳақиқатан ҳам фойда бераётганини ва коронавирус касаллигининг олдини олишини намойиш этишимиз керак ва шундан кейингина биз ундан оммавий равишда фойдаланишимиз мумкин», — деган у.
Эслатиб ўтамиз, Британиядаги hVIVO тадқиқот гуруҳининг коронавирусга қарши вакцина ишлаб чиқиш ва шунга ўхшаш вирусни юқтириш дастурида иштирок этишга 20 мингдан ортиқ одам рози бўлганди. Вакцина тажрибасида қатнашадиганларга катта пул ваъда қилинган.
Оксфорд университети олимлари томонидан ишлаб чиқилган ушбу вакцина ҳали клиник синовлардан ўтказилмасдан туриб оммавий ишлаб чиқариш бошланганди. Reuters’да агар синов вакцинанинг муваффақиятли эканлигини кўрсатса, ундан шу заҳотиёт оммавий фойдаланиш мумкинлиги, акс ҳолда кераксиз вакцина ишлаб чиқаришдан келадиган зарар миқдори бир неча 10 миллион фунт стерлингга тенг бўлиши айтилганди.
Дунёда биринчи бўлиб COVID-19 коронавирусига қарши вакцина синовдан ўтказилган одам америкалик Женнифер Халлер бўлди. Вакцина mRNA-1273 деб номланиб, у Сиэтлдаги Аллергия ва юқумли касалликлар миллий институтида яратилган. Синов учун 45 нафар кўнгилли танлаб олинган. Уларнинг ҳар бирига 28 кун давомида бир хил дозада 2 тадан инъекция қилинади ва улар 2021 йилнинг баҳорига қадар кузатувда бўлади.
Айни пайтда вакцина бир қатор давлатлар, жумладан, АҚШ, Франция, Буюк Британия, Туркия, Хитой ва Россияда ишлаб чиқарилмоқда. Путин коронавирусга қарши вакцинанинг давлат рўйхатидан ўтказилишини тезлаштиришни буюрган.
Изоҳ (0)