Starlink алоқа йўлдошлари қуёш панелларининг нур қайтарувчи бурчаги сабаб тунги осмонда жуда яхши кўринади. SpaceX компанияси аппаратларнинг ҳаддан зиёд ёрқинлигини бартараф этиш борасида иш олиб бормоқда. Бу ҳақда компания асосчиси Илон Маскга таяниб, TechCrunch хабар берган.
Сунъий йўлдошларнинг ёрқинлигидан астрономлар шикоят қилмоқда, уларнинг нури фазони кузатишга халал бермоқда. SpaceX 22 апрель куни навбатдаги аппаратлар гуруҳини коинотга учирган ва уларнинг умумий сони 422 тага етганди.
Маскнинг сўзларига кўра, SpaceX қурилмалардаги қуёш панелларининг бурчагини мувофиқлаштиради.
Кейинчалик сунъий йўлдошларнинг муайян қисми юқорироқ орбиталарга ўтади ва панеллар Қуёшга томон қаратилади. Бу уларга оддий кўз билан қарашни нисбатан қийинлаштиради, бироқ узоқда жойлашган объектларни кузатишда ёруғлик ифлосланиши сабаб қийинчиликлар юзага келади.
Шу сабабли келажакда сунъий йўлдошларга махсус материалдан ишланган радионурланиш учун шаффоф ва сунъий йўлдошлар ёруғлигининг интенсивлигини камайтирадиган «соябонлар» ўрнатилади.
Starlink — глобал сунъий йўлдош орқали алоқа тизими, SpaceX ҳужжатларида тармоқнинг ишга туширилиши учун 12 мингдан 42 мингтагача сунъий йўлдош учирилиши лозимлиги қайд этилган.
SpaceX қурилмаларининг биринчи гуруҳи 2019 йил май ойида учирилган. Компаниянинг режаларига кўра, 2020 йилда Starlink’нинг коинотдаги интернет тизими АҚШ ва Канадада ишлашни бошлайди, 2021 йилга бориб бутун дунёни қамраб олади.
Starlink тизимини яратиш ишлари COVID-19 эпидемиясига қарамай давом эттирилмоқда.
16 апрель куни SpaceX’нинг 60 та сунъий йўлдош ортилган Falcon 9 ракетаси учирилиши коронавирус сабаб қолдирилгани хабар қилинганди.
Изоҳ (0)