Путин АҚШ ва Италияга нима учун инсонпарварлик ёрдами жўнатганини тушунтирди

Россия президенти Владимир Путин видеоконференцалоқа тарзида ўтказилган ва мамлакатдаги санитар-эпидемиологик вазият муҳокамасига бағишланган мажлисда ҳукумат томонидан COVID-19 коронавирус инфекциясига қарши кураш олиб бораётган давлатларга ёрдам кўрсатилиши бир томонлама ҳаракат йўли эмаслигини таъкидлади. Бу ҳақда «РБК» хабар берган.

Путин Хитойга февраль ойида 2 миллионта тиббиёт ниқоби юборилганидан кейин маълум фурсат ўтгач, ХХРдан жавоб тариқасида 150 миллионта ниқоб ва 2 миллионта ҳимоя комбинезони қабул қилиб олинганини мисол қилиб келтирган. РФ президентининг сўзларига кўра, россиялик ҳарбийларнинг COVID-19’га қарши курашда Италияга ёрдамини ва бу борадаги ҳамкорлик ҳам ўз самарасини бераётганини қайд этди.

«Биз Италияга ҳарбий соҳадаги тиббиётчиларни, тиббиёт ускуналарини юбордик, шунингдек, Соғлиқни сақлаш вазирлигининг фуқаролик идораларидан ҳам ходимлар жўнатилган. Шу муносабат билан ушбу ҳамкорликлар бир томонлама эмаслигини алоҳида таъкидлаб ўтмоқчиман. Бу бир томонлама ҳаракатланадиган йўл эмас. Италиядан  қон босимини ўлчаш қурилмаларини харид қиляпмиз, усиз Россияда ўпкани сунъий нафас олдириш аппаратларини ишлаб чиқариб бўлмайди», — деган Россия президенти.

Владимир Путиннинг айтишича АҚШга тиббиёт техникаси ва COVID-19’га қарши курашда асқатадиган муҳим воситаларнинг ҳарбий транспорт самолётида юборилиши ҳам беиз кетмаган.

«Самолёт Нью-Йоркка қўнганининг эртасига америкалик ҳамкорлар билан ўпкани сунъий нафас олдириш ускуналарини ишлаб чиқариш учун зарур бўлган ҳаво босимини ўлчовчи маёқчаларни Россияга олиб келиш бўйича келишув имзоладик», — дея вазиятга баҳо берган Путин.

16 апрелда АҚШ президенти Дональд Трамп Россияга ўпкани сунъий нафас олдириш ускуналарини етказиб беришда кўмак беришга тайёрлигини маълум қилган эди.

20 апрель ҳолатига кўра охирги бир сутка ичида Россияда COVID-19 юқтириб олиш бўйича 4268 та ҳолат қайд этилган, 44 нафар киши касаллик оқибатида вафот этган. Путин видеоконференцалоқа тарзида ўтган навбатдаги мажлисда ҳам коронавирус эпидемияси ҳали ўз чўққисига чиқмаганини билдирган.