Ўзбекистонга келган хитойлик шифокорларнинг 11 нафари бугун, 21 апрель куни, Андижондаги ҳолат билан танишиб, вилоят шифокорлари билан тажриба алмашди. Бу ҳақда «Дарё» мухбири хабар бермоқда.

Фото: Шерзод Сотволдиев

Хитойлик шифокорлар дастлаб Андижон шаҳар марказий шифохонаси ҳамда бир қатор тиббий муассасаларда бўлиб, вилоятда COVID-19 вируси тарқалишининг олдини олиш, назорат қилиш, даволаш борасида олиб борилаётган ишлар билан танишган. Амалга оширилаётган ишларга ижобий баҳо бериш баробарида ўзлари олиб келган илмий видео ўқув машғулотлари ва электрон материалларни тақдим этган.

Фото: Шерзод Сотволдиев

Мутахассислар андижонлик ҳамкасбларига коронавирусга чалинган беморларга тиббий хизмат кўрсатиш, ҳимоя воситаларидан фойдаланиш бўйича тавсия берган. Шифокорларнинг кийим алмаштиришида вирус юқиш хавфи юқори бўлиши, бундай ҳолат Хитойда кўп кузатилгани таъкидланган.

Фото: Шерзод Сотволдиев

Қўшимча қилинишича, хитойлик шифокорлар шу куннинг ўзида Наманган вилоятига жўнаб кетган.

Эслатиб ўтамиз, жорий йил 17 апрель куни 15 нафар хитойлик шифокорлар билан бирга, Хитой Халқ республикаси ҳукумати номидан зарур тиббий буюмлар ва дори-дармонлар воситаларидан иборат гуманитар ёрдам ҳам олиб келинганди.