O‘zbekistonga kelgan xitoylik shifokorlarning 11 nafari bugun, 21-aprel kuni, Andijondagi holat bilan tanishib, viloyat shifokorlari bilan tajriba almashdi. Bu haqda “Daryo” muxbiri xabar bermoqda.
Xitoylik shifokorlar dastlab Andijon shahar markaziy shifoxonasi hamda bir qator tibbiy muassasalarda bo‘lib, viloyatda COVID-19 virusi tarqalishining oldini olish, nazorat qilish, davolash borasida olib borilayotgan ishlar bilan tanishgan. Amalga oshirilayotgan ishlarga ijobiy baho berish barobarida o‘zlari olib kelgan ilmiy video o‘quv mashg‘ulotlari va elektron materiallarni taqdim etgan.
Mutaxassislar andijonlik hamkasblariga koronavirusga chalingan bemorlarga tibbiy xizmat ko‘rsatish, himoya vositalaridan foydalanish bo‘yicha tavsiya bergan. Shifokorlarning kiyim almashtirishida virus yuqish xavfi yuqori bo‘lishi, bunday holat Xitoyda ko‘p kuzatilgani ta’kidlangan.
Qo‘shimcha qilinishicha, xitoylik shifokorlar shu kunning o‘zida Namangan viloyatiga jo‘nab ketgan.
Eslatib o‘tamiz, joriy yil 17-aprel kuni 15 nafar xitoylik shifokorlar bilan birga, Xitoy Xalq respublikasi hukumati nomidan zarur tibbiy buyumlar va dori-darmonlar vositalaridan iborat gumanitar yordam ham olib kelingandi.
Izoh (0)