Brent нефтининг нархи 18 йил ичида биринчи марта 19 доллардан пастга тушди

Brent маркали нефть нархи 21 апрель куни Лондоннинг ICE биржасида яқин орадаги шартномалар учун 26,24 фоизга арзонлашиб, бир баррель учун 19,09 долларга тушди. Савдолар чоғида июнь ойи шартномалари учун Brent маркали нефть нархи бир баррель учун 19 доллардан ҳам пастга тушган ҳамда сўнгги 18 йил ичидаги энг паст кўрсаткич қайд этилган. Бу ҳақда «РБК» хабар берди.

20 апрель куни бўлиб ўтган савдоларда май ойида етказиб бериладиган WTI маркали нефтнинг нархи тарихда биринчи марта манфий қийматга тушди. Бозор иштирокчилари муддати 21 апрелда тугайдиган шартномалар бўйича нефтни сотган. Савдолар чоғида нефть нархи бир баррель учун -40 долларгача тушган, яъни сотувчилар сотиб олинган ҳар бир баррель нефть учун харидорларга 40 доллардан тўлаган. 20 апрелдаги WTI нефти савдолари бир баррель учун -37,63 доллар билан якунланган. Нефтнинг нархи бир кунда 305 фоизга ёки бир баррель учун 55,9 долларга арзонлашган.

WTI нефти нархининг бундай арзонлашиши нефтга бўлган талабнинг пасайиши ва тўлиб кетган нефть сақловчи сиғимларни бўшатишга бўлган уриниш билан изоҳланди. Бироқ кейинроқ WTI нефть маркасини май ойида етказиб бериш борасидаги фьючерслар нархи мусбат қийматга қайтди. NYMEX биржа савдоларида нефть нархи 1,40 долларга чиққан. WTI’нинг июнь ойидаги фьючерслари эса 21,33 долларга қадар кўтарилган.

Нархларнинг умумий пасайиш фонида Россиянинг Urals нефти нархи 20 апрель куни 1 фоизга ошди ва савдолар бир баррель учун 18,4 доллар билан якунланди. Россия президенти матбуот котиби Дмитрий Песков нефть бозоридаги вазиятга муносабат билдириб, Россияда мазкур тебранишларнинг оқибатларини камайтириш учун етарли захира борлигини айтган.

Аввалроқ ОПЕК+ келишувидан сўнг Brent маркасидаги нефть нархи 30 доллардан пастлагани ҳақида хабар берилганди. Кейинроқ Лондон биржасида Brent маркали нефть нархи 2003 йилдан бери илк бора 27 доллардан пастлаганди.