Англиянинг Дерби шаҳрида яшовчи, тарозида 323 килограмм тош босган эркак вазнининг учдан икки қисмини ташлаб, касалхонага ишга жойлашди, деб ёзади Daily Mail.
Тўрт йил аввал 38 ёшли Пол Стивенсон юришга қийналар, семизлиги туфайли деярли уйдан чиқмасди. Онасининг ўлимидан сўнг у зарарли егуликларга ружу қўйди ҳамда 323 килограммгача семириб кетди.
2016 йилда унинг ошқозони жарроҳлик аралашуви билан кичрайтирилди, шундан сўнг Пол кўп овқат еёлмай қолди.
Стивенсонга парҳез ёзиб беришди ва спорт билан шуғулланишга мажбур қилишди. У умумий ҳисобда 209 килограмм вазн ташлаб, ҳозирда унинг оғирлиги 114 килограммни ташкил этмоқда.
Британиялик шундан сўнг ўзини нормал ҳаётга қайтарган шифокорларга миннатдорчилик тариқасида шифохонага ишга кириб, уларга ёрдам беришга қарор қилди.
«Бу менинг 15 йилдан бери биринчи ишим. Соғлиғим билан боғлиқ муаммолар туфайли бошқа ишлай олмасам керак, деб ўйлагандим. Ҳозир менга катта ёрдами теккан шифокорларга ёрдам бериш учун қўлимдан келган ҳамма ишни қилишга тайёрман», — дейди Стивенсон.
Стивенсон ҳамма бўлим шифокорларига ёрдам беради. 12 соатлик иш куни мобайнида у 37 минг қадам ташлайди.
«Ўн қадам ҳам юра олмаган инсон учун 37 минг қадам босиш катта натижа. Бошида чарчоқдан касал бўлиб қолсам керак деб ўйлагандим, лекин ҳаммаси жойида», — дейди эркак.
Изоҳ (0)