Франциянинг энг кекса шифокори мамлакатда коронавирус сабаб вазият оғир эканлигигиа қарамай нафақага чиқишни истамади ва беморларни даволашни давом эттирмоқда. Бу ҳақда The Sun хабар қилган.
98 ёшли амалиёт шифокори Кристиан Шене (Christian Chenay) Париж яқинида жойлашган ўз клиникасида беморларни қабул қилишни вақтинча тўхтатган, бунга мамлакатда эълон қилинган «ўзини яккалаш» тартиби сабаб бўлган. У касаллик аломатларини ҳис қилган ва шу сабабли икки ҳафта карантинда бўлди.
Шу вақт давомида у уйдан туриб виртуал тарзда беморларга маслаҳат ва тавсиялар бериб турган, касаллар орасида шифокор бир неча ўн йиллардан бери даволаётган инсонлар ҳам бор. Карантин якунига етгач доктор яна ўз ишига қайтган ва 1951 йилдан бери ёрдам бериб келаётган қариялар уйидаги беморлари ва бошқа одамларни уйига бориб кўриб қўймоқда.
Шифокор Франция пандемияга тайёр бўлмаганини айтиб, ушбу ҳолатдан дили хира тортганини билдирган. Шене коронавирус тарқалишига қарши курашда ўзини кучсиз ҳис этаётганини, сабаби касалликни даволаш, уни дастлабки босқичдаёқ аниқлаш учун самарали воситалар йўқлини қайд этган.
Нашрнинг ёзишича, Шене ёшлигида чилангарлик қилган, кейин радиолог мутахассислигини эгаллаган, сўнгра умумий амалиёт шифокори сифатида ишлашни бошлаган. Унинг ўғли ҳам шифокор ва у аллақачон нафақага чиққан, аммо доктор Шене пенсияга чиқмоқчи эмас.
Ҳозирда Францияда бир сутка ичида 17 апрель ҳолатига кўра 761 нафар одам COVID-19’дан вафот этди ва мамлакатда коронавирус инфекцияси сабаб қайд этилган ўлимлар сони 18 мингдан ошиб кетган.
Изоҳ (0)