Тожикистон Уламолар кенгаши 18 апрелдан бошлаб Рамазон ойида коронавирус тарқалишининг олдини олиш муносабати билан мамлакат масжидларида жамоат, жумладан, жума ва таровеҳ намозларини ўқишни тақиқлади. Бу ҳақда Уламолар кенгашининг 2-сонли фармойишида сўз боради, деб хабар қилди Asia-Plus.
Фармойишда таъкидланишича, ушбу чораларнинг барчаси мамлакатда коронавирус тарқалишининг олдини олиш мақсадида қабул қилинган.
Уламолар кенгаши бунга ислом давлатларини, хусусан, Саудия Арабистони, Туркия, Эрон, Покистонни мисол қилиб келтирган. Қозоғистон, Қирғизистон ва Ўзбекистонда ҳам шу турдаги чеклов чоралари қабул қилинган.
«Шунингдек, мамлакатда жамоат намозларини ҳам вақтинча тўхтатиш керак», — дейилади фармойишда. Қайд этилишича, Рамазон ойида бирон-бир йиғин: таровеҳ, ифтор ва бошқа тадбирларни ўтказиш тақиқланади.
Тожикистон Уламолар кенгаши 4 март куни мамлакат аҳолисига коронавирус тарқалишининг олдини олиш мақсадида масжидларга боришдан тийилишни тавсия қилганди. Фақатгина дафн маросимларига рухсат этилган эди. Бироқ 20 мартдан бошлаб Тожикистон Дин қўмитаси аҳоли масжидларда намоз ўқиши мумкинлигини маълум қилганди.
Сўнгги маълумотларга кўра, Тожикистонда пневмониядан тўртинчи бемор вафот этган ва унга қараган шифокорлар карантинга олинган. Шунга қарамай, мамлакат ҳали ҳам коронавирус расман қайд этилмаган.
Аввалроқ Ўзбекистон мусулмонлари идораси Уламолар кенгаши коронавирус тарқалишининг олдини олиш юзасидан мамлакат аҳолисига мурожаат ва чақириқ билан чиқиб, мамлакатда жума намозлари вақтинча ўқилмаслигини маълум қилганди.
Изоҳ (0)