Тошкентда 83 ёшли онахон коронавирусдан тузалди. Соғайганлар сони Ўзбекистон бўйича 194 нафарга етди

Тошкентдаги Вирусология илмий-текшириш институти клиникасида коронавирус инфекциясига чалинган беморларнинг яна 14 нафари, Эпидемиология, микробиология ва юқумли касалликлари илмий-текшириш институти клиникасида даволанаётган беморларнинг олти нафари соғайди. Соғлиқни сақлаш вазирлиги матбуот хизматидан маълум қилишларича, улар 18 апрель куни Республика ихтисослаштирилган терапия ва тиббий реабилитация илмий-амалий тиббиёт марказига кузатилган.

Вирусология илмий-текшириш институти клиникасида даволаниб чиққан беморларнинг 10 нафари эркак, тўрт нафари аёллардир. Улардан 8 нафари Тошкент шаҳридан, икки нафари Тошкент вилоятидан ва бир нафардан Қорақалпоғистон Республикаси, Самарқанд, Сирдарё ва Навоий вилоятларидан.

Беморлардан уч нафари Россиядан чартер рейсда келган. Қолган 11 нафари эса коронавирусга чалинганлар билан мулоқотда бўлиб, инфекцияни юқтириб олган. Улар орасида энг каттаси 56 ёшда бўлса, энг кичиги 20 ёшда.

Эпидемиология, микробиология ва юқумли касалликлари илмий-текшириш институти клиникасида даволаниб чиққанлардан бири чироқчилик 83 ёшли онахон бўлиб, Соғлиқни сақлаш вазирлиги ахборотига кўра, у касалхонага оғир аҳволда олиб келинган эди.

Шунингдек, тузалган яна тўрт нафар бемор Тошкент шаҳридан бўлиб (50, 31 ва 30 ёшли эркак ҳамда 57 ёшли аёл), улардан бир нафари Россиядан чартер рейс билан келган, қолган уч нафари эса коронавирусга чалинганлар билан мулоқотда бўлиб, инфекция юқтириб олган. Яна бир нафар фарғоналик 35 ёшли бемор ҳам хориждан келган эди.

Соғлиқни сақлаш вазирлигидан қўшимча қилишларича, Бухоро вилоятида ҳам яна уч нафар бемор (эркак) соғайган. «Шундай қилиб, Ўзбекистон бўйлаб коронавирус инфекциясидан бутунлай соғайган беморлар 18 апрель куни аввалги кунларга нисбатан энг юқори кўрсаткични қайд этган ҳолда, 38 нафарга етиб, жами 194 нафарни ташкил этмоқда», — дейилади вазирлик ахборотида.

Аввалроқ 18 апрель куни Қорақалпоғистон Республикаси, Бухоро, Хоразм, Фарғона, Андижон ва Наманган вилоятларида жами 15 бемор соғайгани ҳақида хабар берилган эди.

Эслатиб ўтамиз, 18 апрель соат 10:00 ҳолатига кўра Ўзбекистон бўйича коронавирус инфекциясини юқтириб олиш билан боғлиқ 1450 та ҳолат аниқланган; ўтган вақт давомида касалликка чалинган тўрт бемор вафот этган.

Бундан ташқари, сўнгги маълумотларга кўра, хориждаги 73 нафар ватандошда ҳам коронавирус аниқланган, уларнинг камида тўрт нафари вафот этган. Вафот этганларнинг уч нафари АҚШда, бир нафари эса Россияда бўлиб турган эди.