Футбол мухлисларига Франциянинг «Лион» ва «Ренн» клублари ҳамда Москванинг «Спартак»идаги фаолияти орқали яхши таниш бўлган швециялик ярим ҳимоячи Ким Чельстрём 2014 йилда кейинчалик жиддий бўлиб чиққан жароҳатига қарамай, трансфер ойнасининг сўнгги дақиқаларида «Арсенал» билан ижара шартномасини имзолашга муваффақ бўлади.
У лондонликлар сафида атиги 135 дақиқа ўтказган бўлса-да, мавсумнинг ҳал қилувчи паллаларида муҳим голлардан бирини уриб, клубнинг тўққиз йиллик танаффусдан кейинги илк совринни қўлга киритишида ўз ҳиссасини қўшади. Жамоа ишқибозлари Чельстрёмни ҳазил тариқасида «Арсенал» «афсонаси» ҳам деб аташади.
Қуйида сизга Чельстрёмнинг «Арсенал» мухлисларига қилган мурожаатини тақдим этамиз. Ҳа, айтганча, бу шунчаки одатий баландпарвоз сўзлар эмас. Чельстрём бошидан ўтказган ғаройиб саргузаштлари ҳақида ҳикоя қилиб беради.
«Арсенал»га ўтиши ҳақида
«Салом, мени эслайсизми? Мен Ким Чельстрёмман. Умид қиламанки, сиз мени «бели синган» йигит сифатида яхши биласиз. Ҳозир барчаси кўнгилдагидек, бу мавзуда бемалол кулиб гапиришим мумкин. «Арсенал»да жуда қисқа вақт ўтказган бўлсам-да, ажойиб хотиралар қолган. Бу вақт давомида тажриба орттирдим, жуда кўплаб қувноқ инсонларни учратдим, етук мураббий қўл остида шуғулландим. Хуллас, айтиб беришга арзигулик воқеаларни бошдан ўтказдим.Келинг, барчасини бошидан, яни «Арсенал»га қандай келиб қолганимдан бошлаймиз. Ўшанда Матьё Фламини бир нечта ўйинга дисквалификация қилинганди, бошқа футболчиларда эса жароҳат бўлган. Мен ўша вақтларда «Спартак» билан Абу-Дабида йиғин ўтказаётган эдим. Агентим қўнғироқ қилганида машғулотга бориш учун автобусга чиқишга ҳозирлик кўраётгандим.
У мендан: «Премьер Лигада ижара асосида тўп суришни истайсансанми», – деб сўради. Унга бу яхши таклиф эканини, бироқ мени ижара қизиқтирмаслигини айтдим. Боиси оилам билан Москвада бахтли яшаётган эдик. У мендан: «Ишончинг комилми?», – деб қайта сўради. Мен эса жавобим қатъийлигини тушунтирдим.
Бироқ 10 дақиқалардан сўнг яна қўнғироқ бўлди.
– Ким, чиндан ҳам ўтмоқчи эмасмисан? Улар сенга жиддий қизиқиш билдирмоқда.
– Йўқ. Уларга айт, мен «Спартак»да қолмоқчиман.
Буни қарангки, бир соатдан кейин у яна мен билан боғланиб: «Фикринг ўзгармадими?», – деб сўради. Бу эса менинг асабимга тега бошлаганди. Шунда у менга:
– Сенга «Арсенал» қизиқяпти, – деди. Айнан ушбу гапдан сўнг ўтишга розилик бердим.
Англиянинг бир нечта клублари менга қизиқиши мумкин эди, аммо «Арсенал»дек топ-клуб эканини хаёлимга ҳам келтирмагандим.
Қароримни ўзгартирдим. Рафиқамга қўнғироқ қилиб, бир неча ойга Лондонга кўчишимизни айтдим. Бу – биз учун ўзига хос тажриба мактаби эди. Шаҳарда узоқ қолмаслигимизни яхши билардик, шунинг учун у ерда шунчаки ҳаётдан завқланиб яшадик.
Абу-Дабида ўқув-машғулот йиғинида бўлганимиз учун, ёнимда бор-йўғи битта чамадон бор эди. Агар хотирам панд бермаса, эртаси кунига биз Москвага қайтишимиз керак эди. «Арсенал»га ўтишимга тўлиқ ишонмасдим, чунки трансфер ойнаси ёпилишига жуда оз муддат қолганди. Тиббий кўриккача ҳаммаси шу даражада тез содир бўлдики, ҳатто мен жамоадошларим билан хайрлашишга ҳам улгурмадим.
Кўпчилик жароҳати ҳақида ўзи яхши билган деб ўйлайди. Лекин ҳаммаси бошқача бўлганди. Жамоа билан соҳилда машқ ўтказаётганимизда қум устига ноқулай йиқилдим. Очиғини айтганда, бу кўпроқ бетон устига йиқилишга ўхшарди. Белимда кучли оғриқни ҳис этдим. Эртаси куни Москвага қайтишимиз керак бўлгани сабабли шифокорга мурожаат қилмадим. Чунки жароҳатнинг қанчалик жиддий эканини ҳали билмасдим. Шунга қарамай, биз «Арсенал»дан белимдаги муаммоларни яширмадик ва ҳозирча у ҳақида етарлича маълумотга эга эмаслигимизни айтдик. Шунда улар шунчаки келишимни сўрашганди.
Лондонга келганимда мутахассислар белимда шикастланиш борлигини аниқлашди, лекин барибир трансфер амалга ошди. Очиғи, жароҳат туфайли барчаси бекор бўлади, деб ўйлагандим».Лондондаги фаолияти ҳақида
«Унгача бир нечта клубларда тўп сурганман, бироқ аввал ҳеч қачон ижарага олинган ўйинчи сифатида кийиниш хонасига кирмагандим. Жамоада ҳамма менинг ўйинчилар етишмаётгани сабабли келганимни яхши биларди. Лондонда доимий турар жойим бўлмаган, мен буни бир саргузашт деб билдим.
Клубда нафақат француз мураббий ва ўйинчилар, балки француз тилида гаплашадиган ходимлар ҳам кўп эди. Мен «Лион»да ўйнаган кезларим бу тилда гапиришни ўрганиб олгандим ва бу менга анча ёрдам берди. Франция чемпионатидаги фаолиятим ҳам жамоадаги ўрнимга таъсир қилди, чунки бошқа футболчилар ҳеч бўлмаганда кимлигимни билишарди. Шунингдек, клубда Никлас Бендтнер билан швед тилида гаплашишим мумкин эди. Ўйлашимча, бу ҳам тезроқ мослашишимда муҳим аҳамият касб этган.
Клубда мендан ташқари яна бир нечта жароҳатланганлар бор эди. Улардан бири Аарон Рэмзи. Қайсидир маънода, жароҳат олишнинг яхши томонлари ҳам бор эди, базада узоқроқ вақт ўтказардим, кўплаб ходимлар билан танишдим. Қолганлар кетганида тикланиш машқларини бажариш учун базада қолардим.
Мен Санти Касорла, Месут Ўзил каби ўз ишининг усталари орасига тушиб қолгандим. Улар билан ҳар куни машғулот ўташ ёқимли эди. У ердаги футболчиларнинг барчаси профессионаллар эди. Терма жамоада Златан Ибраҳимович билан бирга ўйнаганман у – ҳақиқий даҳо эди, лекин Микель Артетанинг ўйинини яқиндан кузатганимда ҳайратдан ёқа ушлаб қолганман. У ўз ишига ниҳоятда садоқатли. Шунчаки унинг ўйинини томоша қилиб, кўп нарсаларни ўрганганман.
Айтганимдек, ҳар доим кечгача машқ қилардим, чунки менинг карьерам оғир ва интизомли меҳнатга асосланган. Кўпинча ҳаммадан кеч кетардим ва баъзан босс (Арсен Венгер) билан Франция футболи тўғрисида суҳбатлашардим. Бу – мен учун улкан тажриба бўлган».Ҳаётидаги энг муҳим пенальти ҳақида
«Бу лаҳзалар мен учун жуда қадрли. «Арсенал»даги ҳиссиётларимни ҳеч қачон бошқа жойда ҳис этмаганман. Англия Кубогидаги ғалабани нишонлаганимиз эса ҳали ҳамон ёдимда.
Мусобақанинг ярим финал учрашуви эди. Деярли барча ўйинларда қайдномага киритилардим, шунинг учун бу сафар ҳам шундай бўлишидан умидвор эдим. Қайдномада бўлсангиз, ҳар нарса юз бериши мумкин. Шундай қилиб, босс мени қўшимча дақиқаларда майдонга туширди. Ҳатто Жиру менга тўп киритиш учун ажойиб имконият яратиб берганди. Бироқ уни кўкка совурдим. Тўпни шу даражада ноаниқ тепдимки, очиғи, унинг ерга тушганига ҳам ишонмадим.
Баҳс ғолиби пенальтилар сериясида аниқланадиган бўлди. Мураббий ёнимга келиб француз тилида:
– Пенальти тепасанми, – деб сўради. Мен унга: «Ҳа, албатта!», – деб жавоб бердим.
– Унда, иккинчиси – сенга, – деди.
Ўша пайтда учрашувнинг қанчалик муҳим эканини тушунмаганман. «Арсенал» мен учун ҳар доим совриндор клуб бўлган. Ҳамма кучли босим остида эди. Боиси охирги соврин анча йиллар аввал қўлга киритилганди. Хотиржам эдим, чунки бу ҳақида ҳеч нарса билмасдим.
Керакли вақтда керакли жойда пайдо бўлдим. Улар биринчи ёки иккинчи пенальтидан фойдалана олмади. Рақиб хатога йўл қўйгач, зарба бериш бирмунча енгил кечади. Майдон марказидан тўпга яқинлашар эканман, хаёлимда: «бу ғалати, бу жуда ғалати», деган сўзлар такрорланарди.
Кўпчилик мендан 11 метрлик зарбага яқинлашаётганимда нима сабабдан кулганимни сўрайди. Ахир мен «Уэмбли»да «Арсенал» сафида пенальтидан гол ура олмаслигим мумкин эди-да. Хайриятки, барчаси кўнгилдагидек якун топди. Мен гол урдим ва биз ғалаба қозондик.
Ушбу пенальти хотираларимни яхши томонга ўзгартирди, деб бемалол айта оламан. Жамоага келгач, жароҳат туфайли узоқ вақт ўйнамадим. Албатта, бу футболнинг бир қисми. Пенальтидан бўлса ҳам гол уриб, ғалабага ҳисса қўшиш ёқимли. Клуб учун муҳим соврин қўлга киритилгани менга янада кўпроқ завқ бағишлади.
Эҳтимол ўша пенальти – фаолиятимдаги энг асосий воқеалардан биридир. Бунга нафақат клуб даражаси, балки барчасининг ғалати тарзда содир бўлгани ҳам сабабдир. Мисол учун, бу Франция чемпионлигини қўлга киритишдан фарқ қиларди. Унинг учун 11 ой давомида кураш олиб бориш керак эди.
Ижтимоий тармоқларда клубдаги фаолиятим тўғрисида кўплаб ҳазилларга кўзим тушади. Ўйлашимча, улар чиндан ҳам кулгили. Клуб учун мендан кўра кўпроқ иш қилган футболчилар талайгина, аммо узоқ вақт давомида ҳеч қандай наф келтирмаганлар ҳам йўқ эмас.
Келдим, пенальтидан гол урдим, ғалаба қозондик ва мен кетдим. «Бели синган» йигит «Арсенал» сафида Англия Кубогида ғалаба қозонади деб ким ўйлабди дейсиз?»
Бошқа мақолалар:
- Лэмпард ва Жеррард қабул қилинмаган, Майкл Оуэн каби юлдузларни тарбиялаган, ҳозир эса тўйхонага айлантирилган футбол мактаби ҳақида
- Мураббий дастхати: Зиданнинг етуклигида Марчелло Липпининг ўрни ҳақида
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)