«Барселона» бош мураббийи Кике Сетьен ПСЖ ҳужумчиси Неймар ва «Интер» форварди Лаутаро Мартинеснинг каталон клубига эҳтимолий трансфери ҳақида фикр билдирди.
«Неймар ёки Мартинес — «Барселона»да қай бирини кўришни хоҳлардим? Иккисини ҳам, чунки улар жуда яхши футболчи. Униси ҳам буниси ҳам, қанақасига улар менга ёқмаслиги мумкин?
Гап шундаки, ўз имкониятинг даражасида ҳаракат қилиш керак. Бу футболчилар қиммат туришини биламиз, шу сабаб уларни қўлга киритиш осон бўлмайди», — дейди Сетьен.
Аввалроқ «Барселона» ушбу икки ҳужумчига қизиқиш билдираётгани хабар қилинганди.
Неймарнинг ПСЖ билан амалдаги шартномаси 2022 йилга қадар мўлжалланган. Жорий мавсум бразилиялик футболчи 22 ўйинда майдонга тушиб, 18 гол ва 10 та самарали узатма муаллифига айланди.
Мартинес эса А Серияда 22 ўйин ўтказди. Унинг ҳисобида 11 гол ва учта ассист бор. Шунингдек, аргентиналик футболчи Чемпионлар Лигасида бешта гол урган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)