Россия пойтахти Москва шаҳрида коронавирус билан касалланишнинг энг юқори даражаси май ойининг бошида юз бериши кутилмоқда. Бу ҳақда шаҳар мэрининг ўринбосари Анастасия Ракова маълум қилди, деб ёзмоқда коронавирусга қарши кураш бўйича тезкор штаб.
Ракованинг сўзларига кўра, яқин 2-3 ҳафтада касаллик энг юқори даражага чиқади ва бу шаҳар учун жуда қийин бўлади.
Москвада 16 апрель ҳолатига кўра, ушбу инфекцияни юқтириб олган 16 146 нафар бемор қайд этилган. Мазкур кўрсаткич бўйича Москва Россияда биринчи ўринни эгаллаб турибди. Шаҳарда жами 1517 киши касалликдан тузалган.
Маълум қилинишича, 16 апрель куни Москвада 1370 та янги ҳолат қайд этилган ва бу сўнгги бир неча кун ичида қайд этилган энг паст кўрсаткич ҳисобланади.
Москва ва шаҳар атрофидаги ҳудудларда 15 апрелдан бошлаб жамоат ва шахсий транспортдан, шунингдек, таксидан фойдаланиш учун QR кодли рухсатнома тизими жорий қилинган. Шаҳар аҳолиси уйдан фақат ишга, яқин атрофдаги озиқ-овқат дўконига ёки дорихонага бориш учун чиқиши мумкин. Шунингдек, ахлат ташлаш ва итни сайр қилдириш учун чиқишга рухсат этилган.
Аввалроқ Москвада ўткир респиратор вирусли инфекция билан хасталанган барча беморлар карантинга олинаётгани ҳақида хабар берилган эди.
Россияда коронавирус юқтириш билан боғлиқ кунлик янги ҳолатлар сони ошиб бормоқда. Хусусан, 11 апрель 1667 та, 12 апрель 2186 та, 13 апрель 2558 та, 14 апрель 2774 та, 15 апрель куни эса 3388 та, 16 апрель куни эса 3448 та янги ҳолат ҳақида хабар берилган.
Изоҳ (0)