Коронавирус инфекциясига чалинган беморнинг оёқларида кўкаришлар бўлиши инкор этилмайди, бироқ бунинг COVID-19’га чалинганлик белгиси эканини аниқлаш учун қўшимча текширувлар ўтказиш талаб этилади. Бу ҳақда Россия халқлар дўстлиги университети юқумли касалликлар кафедраси раҳбари, шифокор-инфекционист Галина Кожевникова «РБК» нашрига маълум қилган.
Кожевникованинг сўзларига кўра, шифокорлар коронавируснинг яққол белгиларини топишга уринмоқда ва бу орқали касалликнинг дастлабки босқичидаёқ даволашга муваффақ бўлишмоқчи.
«Бироқ ушбу ўринда беморларнинг ҳолатини ва умумий вазиятни яхшилаб таҳлил қилиш лозим, сабаби одамда нафас етишмовчилиги кузатилса, бемор кислород танқислигидан азият чекса, бу сианоз ҳам бўлиши мумкин, бунда лаблар кўкариб кетади, танада кислород алмашинуви бузилади ва биринчи навбатда кичик қон томирлари фаолиятига таъсир қилади. Яъни кўкариш ҳолатлари кислород етишмовчилиги туфайли юзага келган бўлиши ҳам мумкин», — деган профессор.Бундан ташқари, Кожевникованинг маълум қилишича бу каби ўхшаш кичик кўкаришлар бактериал инфекцияларда ҳам учраб туради.
«Тошма тошиши ва товонда кўкаришлар бўлиши COVID-19 юқтириб олинганининг яққол белгиси эмас, бу каби симптомлар бошқа касалликларда ҳам учраши мумкин» – дейди тиббиёт фанлари доктори Николай Малишев.
«Ҳозирда COVID-19’нинг турли яширин кўринишлари борлиги юзасидан маълумотлар мавжуд. Бу инфекция кўплаб шаклларга эга касаллик», — деган у.
Малишев дастлаб томоқда кучли оғриқ бўлиши ва иситма чиқиши ҳолатлари коронавируснинг асосий белгиси дея ҳисобланганини эслатди. Кейинчалик COVID-19’нинг бошқа респиратор инфекциялар билан умумий жиҳатлари кўплиги маълум бўлган.«Ушбу симптомларга яна бошқа аломатлар, белгилар қўшилиши мумкин», — дейди Малишев.
Аввал Буюк Британиянинг Daily Mail газетаси испан ва италян шифокорлари беморларнинг оёқлари ва кафтларида кўкаришларнинг бўлиши коронавирус инфекциясининг асосий аломатларидан бири эканини таъкидлаётгани ҳақида хабар берган. Нашрга кўра, Испания, Франция ва Италияда COVID-19’га чалинган айрим беморларда ушбу ташқи белгилар кузатилган.
Изоҳ (0)