Грузияда 17 апрелдан бошлаб коронавирус пандемияси тарқалишининг олдини олиш мақсадида, енгил автомобиллар ҳаракати тўлиқ тақиқланади. Бу ҳақда Грузия бош вазирининг халқаро ишлар бўйича маслаҳатчиси Ираклий Чиковани маълум қилди, деб ёзмоқда «РБК».
Маълум қилинишича, тақиқ 21 апрелгача амалда бўлади, чеклов юк машиналарига қўлланилмайди, шунингдек, етказиб бериш хизматлари ўз ишини давом эттиради.
Чикованининг қайд этишича, 17 апрелдан бошлаб мамлакат фуқаролари учун ниқоб тақиш мажбурий этиб белгиланади. Шунингдек, мамлакатда қабристонларни зиёрат қилиш 10 кунга чекланади.
Грузияда 21 март куни фавқулодда ҳолат эълон қилинган ва у 21 апрелгача амалда бўлади. Мазкур даврда ҳаво ва қуруқликдаги транспорт ташувлари чекланган, карантинни бузганлар жавобгарликка тортилади, 10 кишидан ортиқ одам қатнашадиган тадбирлар тақиқланган. Мамлакат бош вазири Георгий Гахариянинг 14 апрель куни берган баёнотига кўра, ҳукумат фавқулодда ҳолат режимини узайтиришни сўраб президентга мурожаат қилган.
Грузия ҳукумати 31 мартдан бошлаб фавқулодда ҳолат якунлангунигача мамлакатда спиртли ичимликлар савдосини тақиқлаган. Мазкур санадан эътиборан Грузияда комендантлик соати ҳам жорий қилинган.
Мавзуга доир: Грузияда бозорга кирувчи харидорларнинг пуллари дазмол ёрдамида дезинфекция қилинмоқда (видео)
Эслатиб ўтамиз, Ўзбекистонда 30 мартдан бошлаб енгил автомобиллар махсус рухсатнома асосида ҳаракатланиши мумкин. Мазкур рухсатномаларни бериш 9 апрелда тўхтатилган. Баъзи транспорт воситаларининг ҳаракати учун рухсатнома талаб этилмайди.
Изоҳ (0)