Хитой Соғлиқни сақлаш миллий комиссияси маълумотларига кўра, мамлакатда ўтган бир сутка ичида 46 кишида коронавирус аниқланган.
Комиссия маълумотларига кўра, 34 нафар бемор хориждан кириб келган, 12 нафари эса мамлакатда касалликни юқтириб олган. Ўтган бир сутка ичида беморлардан ҳеч бири вафот этмаган. Шунингдек, коронавирус ўчоғи ҳисобланган Хубэй провинциясида касалликка чалиниш бўйича бирорта янги ҳолат қайд этилмаган.
Мамлакат тиббиёт муассасаларида 1107 киши даволанмоқда, улардан 95 нафарининг аҳволи оғир. Хитойда коронавирус пандемияси бошланганидан буён 82 мингдан ортиқ одамда касаллик аниқланган бўлиб, 3342 нафари вафот этган.
Аввалроқ Хитой ўз ҳудудида коронавирус эпидемияси тўхтаганини эълон қилганди. Кейинчалик мамлакат бош эпидемиологи Хитойда коронавируснинг иккинчи тўлқини содир бўлиши эҳтимолини баҳолади. COVID-19’ни даволаш бўйича Шанхайдаги экспертлар гуруҳи аъзоси инсоният ёз фаслида коронавирус пандемиясидан буткул қутула олмаслиги, ноябрь ойида касалликнинг янги тўлқини юзага келиши мумкинлигини айтди.
Изоҳ (0)