Туркманистоннинг Туркманобод шаҳридаги карантин зонасида COVID-19 коронавирус инфекцияси билан касалланган етти киши сақланаётгани маълум бўлди. Бу ҳақда «Хроника Туркменистана» ўз манбаларига таяниб, хабар берди.
Мустақил ОАВ аввал ҳам расмий маълумотлардан фарқли ўлароқ Туркманистонда COVID-19 билан касалланганлар борлигини маълум қилганди. Бироқ ушбу маълумотларни текшириш имконияти мавжуд бўлмаган. Бироқ сўнгги маълумотда видеоёзув ҳам бўлиб, унда вазият батафсил очиб берилган. Видео карантин зонасидаги палаткаларга изоляция учун жойлаштирилган фуқаролардан бири томонидан олинган.
Манбанинг сўзларига кўра, COVID-19 таҳлил натижалари ижобий чиққан етти фуқаро карантин зонасидаги алоҳида палатада сақланмоқда. Палата алоҳида кириш қисмига эга бўлиб, шаҳар санитария-эпидемиология станцияси ходимлари у ердаги тиббиёт ходимларини дезинфекция қилиб турмоқда. Беморларни даволашда H1N1 чўчқа гриппи вакцинасидан, шунингдек, кислород ёстиқчаларидан фойдаланилмоқда.
Мазкур карантин зона шаҳардаги отчопар рўпарасида жойлашган ва атрофида қўриқловчи миноралар қад ростлаган. Зонада ишлаётган шифокорлар қўлқоп ва ниқобларни ўз ҳисобидан сотиб олишга тўғри келаётганидан шикоят қилмоқда. Бироқ қўриқчилар ушбу ниқобларни ҳам карантин зонасидан чиқиб кетаётганда ечиб ташлашни талаб қиляпти.
Расмий ОАВнинг таъкидлашича, Туркманистон COVID-19 етиб келмаган дунёдаги 20 га яқин давлат қаторига киради. Кўплаб материалларда бунга карантин чоралари вақтида қўлланилгани сабаб қилиб кўрсатилмоқда. Шу билан бирга, расмий ОАВ ушбу чоралар ҳақида батафсил маълумот бермаган. Айрим маълумотларга кўра, Туркманистон мактабларида оммавий равишда COVID-19’га тест олиш бошланган.
Аввалроқ Туркманистондаги карантин зонасидан 15 киши қочиб кетгани ҳақида хабар берилганди.
Ўзбекистонда 16 апрель соат 10:00 ҳолатига кўра коронавирусга чалинган беморлар сони 1349 нафарга етган, ҳозирги вақтда улардан 325 нафари Тошкент шаҳрида даволанмоқда, 14 нафар беморнинг аҳволи оғир.
Изоҳ (0)