АҚШ президенти Дональд Трамп Оқ уйдаги чиқиши давомида ўзидаги маълумотларга таяниб, мамлакат коронавирус билан касалланиш бўйича энг юқори чўққини ортда қолдирганини маълум қилди.
«Кураш давом этмоқда, бироқ маълумотларга кўра мамлакат коронавирус билан касалланиш бўйича янги ҳолатларнинг энг юқори чўққисидан ўтиб олди», — дейди Трамп.
Унинг таъкидлашича, вазиятнинг яхшиланиши ҳукуматга пандемия сабаб жорий этилган чекловларни бекор қилиш бўйича тавсиялар бериш борасида бир қарорга келишга ёрдам беради. «Биз бу ҳақда 16 апрель куни гаплашамиз. Матбуот анжумани ўтказиб, куннинг иккинчи ярмида тавсияларни эълон қиламиз», — дейди президент.
Шунингдек, Трамп 16 апрель куни вице-президент Майкл Пенс билан бирга штатлар губернаторлари билан ҳам гаплашишини маълум қилган. Штатларнинг айримлари аввалроқ эълон қилинган муддат — 1 майдан кўра эртароқ очилиши мумкин. «Барча штатларда вазият турлича. Айримларида муаммо кам бўлса, бошқалари эса шу қадар яхши ишладики, муаммолари деярли йўқ», — дея ойдинлик киритади АҚШ президенти.
15 апрель куни АҚШда коронавирус қурбонлари сони бўйича кунлик антирекорд янгиланди — бир суткада 2,2 мингдан ортиқ бемор вафот этди. АҚШ президенти Дональд Трамп Жаҳон соғлиқни сақлаш ташкилотини молиялаштириш тўхтатилганини эълон қилди. Америка етакчисининг фикрича, ташкилот ўзининг асосий вазифасини бажара олмаган ва бунинг учун жавоб бериши керак.
Сўнгги маълумотларга кўра, АҚШда коронавирус қурбонлари сони 30 минг кишидан ошиб кетди, касалликни юқтириб олганлар эса 640 минг кишига яқинлашмоқда.
Изоҳ (0)