Ички ишлар вазирининг буйруғи асосида тизимда янги лавозим тайинловлари амалга оширилди

Ички ишлар вазирининг буйруғи асосида Тошкент шаҳар Ташкилий бошқармаси бошлиғи, Жиззах вилояти Зомин тумани ИИО ФМБ бошлиғи, Самарқанд вилояти ИИБ Йўл ҳаракати хавфсизлиги бошқармаси бошлиғи, Ургут тумани бўйича ИИО ФМБ бошлиғи, Пастдарғом тумани ИИБ бошлиғи, Тошкент вилояти Янгийўл шаҳар ИИБ бошлиғи каби лавозимларга тайинловлар амалга оширилди. Бу ҳақда ИИВ ахборот хизмати хабар берди.

Подполковник Фарҳод Тўйчиев Жиззах вилояти Зомин тумани бўйича ИИО ФМБ бошлиғи лавозимига тайинланди. Тайинловга қадар Тўйчиев Жиззах вилояти Зомин тумани ИИБ бошлиғи лавозимида хизмат қилган.

Аввал Сирдарё вилояти ИИБ Йўл ҳаракати хавфсизлиги бошқармаси бошлиғи лавозимида хизмат қилган полковник Фарҳод Шайзоков Самарқанд вилояти ИИБ Йўл ҳаракати хавфсизлиги бошқармаси бошлиғи лавозимини эгаллади.

Тайинловгача Самарқанд вилояти ИИБ Жиноят қидирув бошқармаси бошлиғи лавозимида ишлаган подполковник Отабек Жалилов Самарқанд вилояти Ургут тумани бўйича ИИО ФМБ бошлиғи лавозимига тайинланди.

Полковник Равшан Давиров Самарқанд вилояти Пастдарғом тумани ИИБ бошлиғи лавозимига тайинланди. Тайинловга қадар Давиров Самарқанд вилояти ИИБ 38-сон манзил колонияси бошлиғининг тезкор-қидирув, тартибот ва тарбиявий ишлар бўйича ўринбосари лавозимида хизмат қилган.

Тошкент вилояти Тошкент тумани ИИБ бошлиғининг биринчи ўринбосари лавозимида хизмат қилган майор Хайриддин Азизов Тошкент вилояти Янгийўл шаҳар ИИБ бошлиғи лавозимига тайинланди.

Подполковник Равшан Султонхўжаев Тошкент шаҳар ИИББ Ташкилий бошқарма бошлиғи лавозимига тайинланди. У ушбу тайинловга қадар ИИВ Тезкор-қидирув ҳамкорлиги бошқармаси бошлиғининг ўринбосари лавозимида ишлаб келаётганди.

Аввал ҳам ИИВ тизимида бир нечта тайинловлар амалга оширилгани хабар қилинганди.