Айни пайтда Тожикистон ҳудудида бўлиб турган хорижий давлатлар фуқаролари, шу жумладан, Ўзбекистон фуқароларига коронавирус сабабли виза муддатини узайтириш имконияти яратилди. Бу ҳақда Ўзбекистон Ташқи ишлар вазирлиги хабар берди.
Ўзбекистоннинг Душанбе шаҳридаги элчихонаси маълумотига кўра, Тожикистон Ташқи ишлар вазирлиги коронавирус пандемияси сабабли юзага келган вазиятни инобатга олган ҳолда Тожикистонда вақтинча бўлиб турган хорижий мамлакатлар фуқаролари ва фуқаролиги бўлмаган шахсларнинг виза ва рўйхатда туриш муддатлари эпидемиологик вазият барқарорлашгунигача узайтирилишини маълум қилди.
Тожикистон ҳудудида бўлиб турган Ўзбекистон фуқаролари виза муддатини узайтириш учун Тожикистон Ташқи ишлар вазирлигининг бош консуллик бошқармаси ва Сўғд вилоятидаги ваколатхонасига мурожаат қилиши мумкин. Рўйхатда туриш муддатини узайтириш учун эса Тожикистон Ички ишлар вазирлигининг паспорт-рўйхатга олиш хизматига мурожаат қилиш керак бўлади.
Аввалроқ Тожикистон коронавирус хавфи сабабли хорижликларнинг мамлакатга кириш-чиқишини вақтинчалик тақиқлагани ҳақида хабар берилган эди.
Эслатиб ўтамиз, коронавирус билан боғлиқ эпидемиологик вазият сабабли Ўзбекистонда хорижий фуқароларнинг виза муддати 5 майгача автоматик тарзда узайтирилган.
Изоҳ (0)