Чирчиқ шаҳридаги махсус карантин зонасида сақланаётган аёл фарзандли бўлди. Бу ҳақда Тошкент вилояти ҳокимлиги хабар берди.
Маълум қилинишича, 2002 йилда туғилган Дўстёрова Севара 27 март куни Қозоғистондан автобус орқали оила аъзолари билан келганлиги сабабли карантинга олинган.
Ҳомиладорлиги туфайли аёл 12 апрель куни соат 22:00 да тез ёрдам машинасида Тошкент вилояти Перинатал марказига жойлаштирилган. Аёл 13 апрель куни соат 10:00 да ўғил фарзандни дунёга келтирган.
Ҳокимликнинг хабар беришича, ҳозирда она ва боланинг соғлиғи яхши, вазият малакали шифокорлар назоратида.
Маълумот учун, Ўзбекистонда коронавирусга чалинганлар сони 934 нафарга етди, 12 нафари оғир аҳволда. Ўзбекистонда коронавирус инфекциясига чалиниш билан боғлиқ дастлабки ҳолат қайд этилганидан бери (15 март) 85 киши соғайди, тўрт киши (икки аёл ва икки эркак) эса коронавирус сабаб вафот этди.
Изоҳ (0)