Ўзбекистонда коронавирус сабабли жорий қилинган карантин даврида зарурат юзасидан ҳам кўчага чиққан киши ёнида шахсини тасдиқловчи ҳужжатни олиб юриши шарт. Бу ҳақда Ички ишлар вазирлиги ахборот хизмати раҳбари Шоҳрух Ғиёсов маълум қилди.
Унинг сўзларига кўра, ички ишлар органларига бошқа идоралар билан ҳамкорликда фуқароларнинг карантин қоидаларига риоя этишини назорат қилиш, тартиб бузганларга нисбатан кескин чора кўриш вазифаси юклатилган.
Маълум қилинишича, кўчада фуқарони кўрганда ҳар бир ички ишлар органи вакили ёки Миллий гвардия ходими уни тўхтатиб, кўчага чиқиш мақсадини сўрашга ҳақли. Бунда фуқаро ўзининг шахсига аниқлик киритиши керак.
Вазирлик вакилининг таъкидлашича, агар фуқаронинг ёнида шахсини тасдиқловчи ҳужжат бўлмаса, уни ички ишлар органига олиб бориб, шахсини аниқлаштириш зарурати пайдо бўлиши ҳам мумкин. Шунинг учун ҳаётий зарурат билан кўчага чиқилганда фуқаролар ўзи билан фуқаролик паспортини олиб юриши керак.
Аввалроқ Ўзбекистонда карантин қоидаларига амал қилмаганлар сони 55 мингдан ошгани ҳақида хабар берилган эди.
Эслатиб ўтамиз, 6 апрелдан бошлаб Республика махсус комиссияси томонидан қўшимча чора-тадбирлар белгиланди. Жумладан, «ўзини яккалаш» ҳаёт тарзи Нукус ва Тошкент шаҳарлари ҳамда вилоятлар марказларида мажбурий равишда жорий этилди. Шунингдек, Тошкент ва Нукус шаҳарлари ҳамда вилоят марказларида истисно ҳолатлардан ташқари мототранспорт (скутер) ҳамда велосипедда ҳаракатланиш карантин даврида вақтинча чекланди.
Изоҳ (0)