Хоразмда Тупроққалъа тумани ҳокимлигини ташкил этиш тўғрисидаги Президент қарори эълон қилинди

«Хоразм вилояти таркибида Тупроққалъа туманини ташкил этиш билан боғлиқ ташкилий масалаларни ҳал этиш чора-тадбирлари тўғрисида»ги Президент қарори қабул қилинди. Бу ҳақда Адлия вазирлигининг «Ҳуқуқий ахборот» Telegram канали хабар берган.

Қарорга мувофиқ, Хоразм вилояти таркибида Тупроққалъа тумани ҳокимлиги ташкил этилди. Қарор билан давлат бошқаруви органлари ва хўжалик бирлашмаларининг Тупроққалъа туманидаги бўлинмалари рўйхати ҳамда ушбу туманни ташкил этиш билан боғлиқ ташкилий масалаларни ҳал этиш бўйича республика комиссияси таркиби тасдиқланди.

Республика комиссияси туманни ташкил этиш билан боғлиқ зарур комплекс ташкилий-техник тадбирлар режасини ишлаб чиқади, шунингдек, юзага келадиган ижтимоий масалаларнинг ўз вақтида ҳал этилишини таъминлайди.

Туманда қўшимча штат бирликлари ажратилган ҳолда адлия бўлими ва фуқаролик ҳолати далолатномаларини ёзиш органлари, шунингдек, давлат хизматлари маркази ташкил этилади.

2020 йил 1 сентябрга қадар туман марказининг 2035 йилгача бўлган бош режаси ишлаб чиқилади.

Шунингдек, туманнинг бутун ҳудуди учун «Ҳазорасп» эркин иқтисодий зонасида белгиланган имтиёз ва преференсиялар амал қилиши белгиланди.

Аввал Олий Мажлиси Қонунчилик палатасининг навбатдаги мажлисида депутатлар қатор қонун лойиҳалари билан бир қаторда Хоразм вилояти таркибида Тупроққалъа туманини ташкил этиш ҳамда Ҳазорасп тумани чегараларини ўзгартириш тўғрисидаги масалани ҳам кўриб чиққани ҳақида хабар берилганди. Хабарда Ўзбекистон Президенти Шавкат Мирзиёевнинг 12—13 март кунлари Хоразм вилоятига ташрифи давомида берилган топшириқ асосида Ҳазорасп тумани Питнак шаҳри ҳудудидаги «А.Ибрагимов», «Муҳаббат», «Навбаҳор», «Ёшлик», «Шарлауқ» «Охунбобоев», «Обод», «Саяпир», «Шехлар», «Пастом» ва «Саидлар» ҳамда Тупроққалъа маскани ҳудудидаги «Саримой», «Нукус», «Ҳазорасп» ва «Тупроққалъа» маҳаллалари ташкил этилаётган Тупроққалъа тумани таркибига ўтказилиши, Питнак шаҳри эса Тупроққалъа туманининг маъмурий маркази этиб белгиланиши айтилганди.

2020 йил 31 январда ҳукумат қарори билан Сурхондарёда Бандихон тумани ҳокимлиги ташкил этилганди.