«Ўзгидромет» хабарига кўра, 13 апрель, душанба куни ҳам деярли бутун Ўзбекистон ҳудуди нисбатан илиқ, аммо жуда нам ҳаво оқимлари таъсирида бўлади. Республика ҳудудининг катта қисмида ёмғир, айрим жойларда кучли ёмғир ёғади.
Бухоро ва Навоий вилоятларида ёмғир фақат эрталаб ёғиб ўтди, Қорақалпоғистонда ва Хоразм вилоятида об-ҳаво ёғингарчиликсиз бўлади.
14 апрель, сешанба куни ҳам республиканинг айрим жойларида ёмғир ёғади, тоғолди ва тоғли ҳудудларда кучли ёмғир ёғиши мумкин. Қорқалпоғистон Республикаси ҳамда Хоразм, Бухоро ва Навоий вилоятларида ёғингарчилик кутилмайди.
15 апрель, чоршанба куни, Фарғона водийси вилоятларида ёмғир ёғади, Самарқанд, Қашқадарё ва Сурхондарё вилоятларининг айрим жойларида кучсиз ёмғир ёғиши мумкин.
Республика бўйлаб баъзи жойларда шу кунларда шамолнинг тезлиги секундига 15-20 метргача кучайиши мумкин, кундузги ҳарорат 13-18 даража илиқ атрофида бўлади.
13—14 апрель кунлари республиканинг тоғолди туманларида сел келиши хавфи бор.
Ҳафтанинг иккинчи ярмида нам ҳаво оқими республика ҳудудини бутунлай тарк этади. Мамлакатда об-ҳаво ёғингарчиликсиз бўлади. Ҳаво ҳарорати кўтарила бошлайди, ва кундузи 19-24 даражагача етади, бу апрель ойи ўртаси учун хос бўлган ҳароратдир.
Аввалроқ «Ўзгидромет» республикада 12—14 апрель кунлари шиддатли шамол эсиб, кучли ёмғир ёғиши кутилаётганини маълум қилганди.
Изоҳ (0)