Тошкентда карантин зонасидан чиққан фуқароларни ўз манзилига етказмасдан йўлда ташлаб кетган автобус ҳайдовчи жазоланди. Бу ҳақда «Тошшаҳартрансхизмат» матбуот хизмати хабар бермоқда.
Маълум бўлишича, 10 апрель куни Тошкент вилояти Юқори Чирчиқ туманида жойлашган карантин ўташ махсус ҳудудида бўлган фуқароларга уйларига қайтиш учун рухсат берилган.
Уларни манзилларига етказиш учун эса «Тошшаҳартрансхизмат» АЖ жами 11 та MAN русумли туристик автобуслар ажратган бўлиб, шундан 6 таси вилоятларга кетувчи фуқароларни белгиланган манзилларга етказиш учун бириктирилган. 5 та автобус эса, Тошкент шаҳрида яшовчи фуқароларни манзилларига етказиб қўйиши белгиланган.
Таъкидланишича, барча автобуслар фуқароларни белгиланган манзилларга етказган. Фақат пойтахтнинг Жанубий вокзал, 16-шаҳар шифохонаси, Чилонзор метроси, Фарҳод бозори, Олмазор, Себзор йўналишлари бўйича кетаётган автобус сўнгги йўловчиларини ўзаро тушунмовчилик сабаб манзилларига етказмаган.
Ушбу ҳолат ижтимоий тармоқларда кенг муҳокамаларга сабаб бўлганидан сўнг, юзага келган мазкур вазият жамият мутасаддилари томонидан ўрганилган.
MAN русумли туристик автобус ҳайдовчиси М.Х. ҳақиқатан ҳам 3 нафар фуқарони ўз манзилига (Алгоритм мавзеси) етказмасдан, Фарҳод бозори атрофида тушириб қолдирганини тан олган. Оқибатда ушбу фуқаролар йўлда қолиб кетган.
Хабарда айтилишича, ҳайдовчининг ушбу хатоси сабаб унга нисбатан маъмурий жавобгарлик жазоси қўлланилган, бироқ айнан қандай жазо тайинланганига аниқлик киритилмаган.
Изоҳ (0)