Ижтимоий тармоқда айрим фуқаролар томонидан банкоматларга «Банкомат ишламайди» ёки «Карантин» деган ёзувларни ёпиштириб кетилаётгани ҳақида гап-сўзлар тарқалди.
Марказий банкнинг жамоатчилик билан алоқалар ва коммуникацион сиёсат департаменти директори ўринбосари Акмал Назаровнинг 11 апрель куни АОКАда бўлиб ўтган брифингда маълум қилишича, Марказий банкнинг расмий коммуникация каналларига бугунги кунга қадар фуқаролардан бундай ҳолатлар ҳақида хабарлар келиб тушмаган.
Акмал Назаров келгусида бу каби ҳолатлар юзага келган тақдирда банкоматларга хизмат кўрсатувчи банклар ёки Марказий банкнинг ягона ишонч телефони – 71-200-00-44 рақами орқали мурожаат қилиш мумкинлигини айтди.
Ҳозирги кунда республиканинг барча ҳудудларида (Humo ва Uzcard) тўлов тизимларининг жами 5 100 дона банкоматлари банк инфратузилмалари ва аҳоли гавжум бўлган жойларга ўрнатилгани, мазкур банкоматларнинг узлуксиз ишлаши ҳамда доимий нақд пул билан таъминланиши мунтазам назоратга олинганини билдирди.
«Ўз навбатида, фуқаролардан банкоматлар орқали нақд пул маблағларини олишлари учун оралиқ масофани сақлаш, банкоматларга зарар етказмаган ҳолда фойдаланиш ҳамда кенг аҳоли манфаатларини ўйлаб, банкоматларга турли асоссиз ёзувли қоғозларни ёпиштирмасликлари сўраб қоламиз», — дейди Марказий банк вакили.
Шунингдек, нақд пул ўзида вирусни сақлаш хусусиятига эгалиги боис, ундан имкон қадар камроқ фойдаланишни, харидларни пластик карталар ёрдамида амалга оширишни, шунда ҳам пластик картани тез-тез дезинфекция қилиб туришни тавсия этди.
Ўзбекистон бош санитария инспектори Нурмат Отабеков ҳам карантин вақтида нақд пулдан кўра, пластик карточкадан фойдаланиш зарарсизроқ эканини айтганди.
Изоҳ (0)