Ўзбекистонда коронавирусдан тузалган ёки карантинда бўлган шахсни ҳақорат қилганлик, шаъни ва қадр-қимматига путр етказганлик, камситганлик, унинг шахсий ҳаёти тўғрисидаги маълумотларни тарқатганлик учун 9 миллион сўмгача жаримага тортилиши мумкин. Бу ҳақда Адлия вазирлиги матбуот хизмати хабар бермоқда.
Вазирлик хабарида айтилишича, айрим шахслар карантиндан қайтган ёки касалликдан тузалган фуқароларни маънавий қўллаб-қувватлаш ўрнига уларга нисбатан ҳурматсизлик қилиш, камситиш, шаъни ва обрўсига путур етказиш ёки уларни касалликни бошқаларга ҳам юқтиришида айблаш ҳолатлари ҳам учрамоқда.
Мавзуга доир: Ўзбекистонда карантинга жойлаштирилган шахслар телефонларининг олиб қўйилиши қонунга зид эмасми?
Коронавирусдан тузалган ёки карантинда бўлган шахсни ҳақорат қилганлик, шаъни ва қадр-қимматига путр етказганлик, камситганлик, унинг шахсий ҳаёти тўғрисидаги маълумотларни тарқатганлик учун 9 миллион сўмгача маъмурий жарима белгиланган.
Агар маъмурий жазо қўлланилганидан сўнг ушбу қилмиш такроран содир этилса, айбдорга 22,3 миллион сўмгача жарима ёки 300 соатгача мажбурий жамоат ишлари ёхуд 2 йилгача ахлоқ тузатиш ишлари каби жиноий жазо қўлланилиши мумкин.
Бундан ташқари, фуқаронинг шахсий ҳаётига доир маълумотларни қонунга хилоф равишда ошкор қилиш оғир оқибатларга олиб келса, айбдор 44,6 миллион сўм жарима ёки 360 соатгача мажбурий жамоат ишлари ёки 3 йилгача озодликни чеклаш ёхуд 3 йилгача озодликдан маҳрум қилиш билан жазоланади», — дейилади вазирлик хабарида.
Шунингдек, вирусга чалинганлигини била туриб уни бошқаларга қасддан юқтирган, карантин тартибини бузиб бошқаларни хавф остига қўйган шахслар ҳам қонунда белгиланган жавобгарликка тортилиши таъкидланган.
ИИВ маълумотларига кўра, Ўзбекистонда 16 мартдан 12 апрелга қадар карантин қоидаларига амал қилмаслик билан боғлиқ жами 51 182 та ҳолат аниқланди.
Айни пайтда Ўзбекистонда коронавирусга чалинганлар сони 833 нафарга етди Коронавирус инфекциясига чалиниш билан боғлиқ дастлабки ҳолат қайд этилганидан бери (15 мартдан буён) 66 киши соғайди, тўрт киши (икки аёл ва икки эркак) эса коронавирус сабаб вафот этди.
Изоҳ (0)