Бухорода «комендантлик соати жорий этилади», дея ёлғон маълумот тарқатиб, жамоатчиликни чалғитган аёл қидирилмоқда. Бу ҳақда «Дарё» мухбири Лайло Ҳайитова маълум қилди.
Таъкидланишича, бухоролик аёл Telegram ижтимоий тармоғида «Ҳамма икки кун ичида тараддудини кўриб, бозор қилсин. Бухорода серена овозлари чалингандан сўнг, комендантлик соати жорий қилинади. Бу овоз эшитилгач, кўчага чиқмаслик талаб этилади. Дорихона ҳамда озиқ-овқат дўконлари ёпиб қўйилади. Шу туфайли дори воситалари ва озиқ-овқат маҳсулотларини жамланг», — дея одамлар орасида ваҳима уйғотувчи ёлғон аудиоёзув тарқатган.
«Бироқ, ушбу хабар ёлғон ва ҳақиқатга тўғри келмайди. Шунга қарамасдан ўша аёл ижтимоий тармоқларда ваҳима уйғотишга улгурди. Бинобарин, аҳоли ўртасида юқумли касаллик ҳақида ваҳима тарқатилишига сабаб бўладиган ёлғон хабар тарқатганлик учун жиноий жавобгарлик мавжуд», — дейди Ахборот ва оммавий коммуникациялар агентлиги Бухоро вилоят ҳудудий бошқармаси бошлиғи Гулнора Самиева.
Айтилишича, айни пайтда ҳуқуқ-тартибот идоралари ёлғон маълумот тарқатган аёлни излашга тушган. Аммо ҳалигача тополмаган.
Эслатиб ўтамиз, аҳоли орасида ваҳима чиқаришга қаратилган маълумотлар ва материалларни ҳар қандай шаклда тарқатиш 66 миллион 900 минг сўмдан 89 миллион 200 минг сўмгача миқдорда жарима ёки 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.
Изоҳ (0)