«Дарё» нашрига Фарғона вилоятидаги шифохонада фаолият юритувчи ҳамширадан мурожаат келиб тушди. Исмини ошкор қилса ишдан ҳайдалишидан қўрққан мурожаатчининг таъкидлашича, Республика шошилинч тиббий ёрдам илмий маркази Фарғона филиали тез тиббий ёрдам марказий бўлимида ҳамширалар тез ёрдам машинасини ювишга мажбурланади.
Исми сир қолишини истаган ҳамширанинг айтишича, икки йил аввал бўлимда санитар ходимлар штати қисқартирилган. 24 соат давомида уч қаватли бўлим биносини тозалаш бир нафар санитар ходим зиммасида қолган. Натижада санитар ходимларнинг айрим хизмат вазифалари ҳамшираларга юклатилган.
«Икки йилдан бери тез ёрдам машиналарини ювишга мажбурмиз. Ҳар куни машиналарнинг устки қисмини ҳайдовчилар, ичини эса навбатчи ҳамширалар ювади. Машинани ювишдан бош тортсак, ‘Санитария-эпидемиология осойишталик маркази (СЕОМ)дан текширув келса, тозалик учун ўзларинг жавоб берасизлар дейишади’, — дейди мурожаатчи.
«Бўлимда машиналарни ювиш учун етарли шароит йўқ. Машина ювган кийимимизда ноилож чақирувга ҳам борамиз, беморлар билан мулоқотда бўламиз. Бу гигиена қоидаларига тўғри келмайди-ку. Бўлимда ювиниш хонаси йўқ. Кийим алмаштириш учун алоҳида хона ажратилмаган» — деб қўшимча қилади ҳамшира.
Аниқланишича, марказий тез тиббий ёрдам бўлимида 8 та тез ёрдам машинаси мавжуд. Уларни ювиш учун ҳамшираларга қўшимча ҳақ тўланмайди.
«Машина ювгани учун ҳайдовчилар ойлигига 30 фоиз устама қўшилади. Лекин бизга ҳеч қандай қўшимча тўлов берилмайди. Ҳозир бир кунда камида 25 та чақирувга боряпмиз. Қиш кунларида битта тез ёрдам бригадасига 30 тагача чақирув бўларди. Шунча ишдан ортиб, қишда совуқ кунларда ҳам машина ювдик», — дея ҳолат ҳақида маълумот беради ҳамшира.
Таъкидланишича, бўлимда ишлаётган 150 нафардан ортиқ ходимлар карантин пайтида ҳимоя воситалари билан етарли даражада таъминланмаган.
«Карантин эълон қилинганидан кейин тиббий ниқоблар етишмай қолди. Талаб қилаверганимиздан сўнг, битта ходимга 8 донадан дока ниқоб беришди. ‘Ювиб-ювиб ишлатиб турасизлар’, дейишди. Шу ниқоблар ҳам ҳамма ходимларга етмади. 50 тача ходим олдик, холос. Ниқоб етмаганлар ўзлари пулга сотиб олиб, ишлатишяпти. Икки-уч кун олдин бир марталик ҳимоя кийимларини олиб келишди-ю, ҳали ходимларга беришмади», — дейди вазиятдан норози ҳамшира.
Мурожаатчининг қўшимча қилишича, ходимлар учун тиббиёт қўлқоплари ўз вақтида, етарли даражада берилмоқда.
Республика шошилинч тиббий ёрдам илмий маркази Фарғона филиали тез тиббий ёрдам марказий бўлими мудири Рамзжон Мирзараҳимов ҳамшираларнинг машина ювишини тасдиқлади.
«Бўлимимизда санитар ходимлар сони қисқартирилгани бор гап. Шундан кейин тез ёрдам машиналарини ювиш ҳайдовчилар зиммасига юклатилган. Бу иш учун уларга қўшимча 30 фоиз устама тўланади. Машиналарнинг тиббий жиҳозлар жойлашган қисмини ҳамширалар тозалайди. Пол қисмини ювишга бинодаги санитар ходимлар ёрдам беради», — дейди Рамзжон Мирзараҳимов.
Мутасаддининг маълумот беришича, филиалга 100 минг дона тиббий ниқоб олиб келиниб, барча ходимларга тарқатилган. Бўлимда тиббиёт ниқоби етишмаслиги тўғрисидаги гап ўринсиз.
«Бўлимдаги ходимлар учун бир марталик ҳимоя кийимлари ҳам етарли даражада, — дейди Рамзжон Мирзараҳимов. — Қоида бўйича бўлимимизда 3 та бригадага етарли, яъни 12 дона ҳимоя кийими бўлиши шарт. Биз аввалдан 25 та кўп марталик ҳимоя кийимларини тайёрлаб қўйганмиз. Карантин эълон қилингач, вилоят Санитария-эпидемиология осойишталик маркази томонидан яна 110 дона бир марталик ҳимоя кийимлари ва кўзойнаклар берилди. Юқори тана ҳарорати билан мурожаат қилган барча беморлар ва карантиндаги фуқаролар хонадонига ходимларимиз фақат махсус ҳимоя кийимида жўнатилмоқда».
Бўлим бошлиғининг тан олишича, бўлимда махсус кийим алмаштирадиган хона йўқ.
«Лекин шифокор ва ҳамширалар учун алоҳида хоналар ажратилган. Хоналарга кийим қўйиш учун «шкаф»лар қўйилган. Иссиқ-совуқ сув бор» — дейди Рамзжон Мирзараҳимов.
Изоҳ (0)