Turkiyaning 30 ta shahri va Zonguldak viloyatining barcha hududida koronavirus tarqalishiga qarshi kurash chorasi sifatida komendantlik soati joriy etildi. Bu haqda mamlakat ichki ishlar vazirligiga tayanib, Anadolu agentligi xabar berdi.
Ta’kidlanishicha, ushbu chora 11-aprel yarim tundan kuchga kiradi va 13-aprel soat 00:00 ga qadar davom etadi. Ushbu 48 soat davomida komendantlik soati joriy etilgan hududlar aholisi o‘z uylarini tark eta olmaydi.
Ma’lumotlarga ko‘ra, komendantlik soati poytaxt Anqaraga, shuningdek, mamlakatning eng yirik shaharlaridan biri — Istanbulga ham tegishli.
Jons Hopkins universiteti ma’lumotlariga ko‘ra, Turkiyada koronavirus bilan kasallanganlar soni 47 ming kishidan oshgan, 1006 kishi vafot etgan.
Eslatib o‘tamiz, 4-apreldan boshlab Turkiyaning yirik shaharlariga avtotransportlar kirishi hamda chiqishi taqiqlandi, 20 yoshdan kichik bo‘lganlar uchun komendantlik soati e’lon qilingan edi. Mamlakat hukumati fuqarolarning jamoat joylarida niqobda yurishini majburiy qilib qo‘ydi.
Izoh (0)