Қозоғистондаги фавқулодда ҳолат тартиби апрель ойи охиригача узайтирилади. Бу ҳақда мамлакат президенти матбуот хизмати маълум қилди.

Фото: «Nur.kz»

10 апрель куни президент Қосим-Жўмард Тўқаев раислигида Фавқулодда ҳолатлар бўйича давлат коммиссиясининг навбатдаги мажлиси ўтказилган. Видеоалоқа кўринишида бўлиб ўтган мажлисда коронавирус тарқалишига қарши кураш доирасида фавқулодда ҳолат тартибини апрель ойи охиригача узайтиришга қарор қилинган.

«15 апрель куни фавқулодда ҳолат тўғрисидаги фармоним ўз кучини йўқотади. Фавқулодда ҳолат режимини камида апрель ойи охиригача узайтиришга тўғри келиши ҳозирданоқ кўриниб турибди. Биз ҳали коронавирус билан касалланишнинг юқори чўққисидан ўтганимиз йўқ. Эпидемия вазиятини юмшатиш мумкин эмас. Шу сабабли пойтахт, Олмаота, Чимкент ва тегишли вилоятларда карантин режимини апрель ойи охиригача узайтиришни буюраман», — деган президент.

«Тушунаман, одамлар кўчага чиқишни, одатий турмуш тарзига қайтишни хоҳлайди. Лекин карантинга амал қилиш ва ўз-ўзини изоляция қилишдан бошқа чора йўқ. Акс ҳолда вазиятга ‘ғарқ бўламиз’ ва эпидемия бутунлай тарқалиб кетиб, бутун халқ соғлиғи, шу жумладан мамлакат хавсизлиги хавф остида қолади», — деб таъкидлаган давлат раҳбари.

Эслатиб ўтамиз, Қозоғистонда коронавирус тарқалиши муносабати билан 16 мартдан 15 апрелга қадар фавқулодда ҳолат режими жорий қилинган. Айни пайтда мамлакатда коронавирусга чалинганлар сони 859 кишига етди, касалликдан вафот этиш бўйича 10 та ҳолат қайд этилган.

Ўзбекистонда эса коронавирусга чалинганлар сони 729 нафарга етди.