Франция терма жамоаси собиқ ҳимоячиси Вилли Саньол 2006 йилги Жаҳон Чемпионатидан кейин миллий жамоадаги собиқ сафдоши Зинедин Зидан билан икки йил гаплашмай юрганини тан олди.
Зидан мусобақанинг финалидан ўрин олган Италияга қарши баҳсда Марко Матераццига боши билан зарба бериб, майдондан четлатилгани Саньолга ёқмаган эди.
«Бу ўйиндан менга энг ёрқин ва энг ёмон хотиралар қолган. Биз Зизунинг пенальтидан унумли фойдаланганидан хурсанд бўлгандик. Менинг сарқитдан қолган ўйларим пенальтини «Паненко» услубида тепиш жуда таваккалчилик эканини айтарди. «Зидан ақлдан озганми?», — илк таассуротим шундай бўлди. У гол урди ва мен бахтли эдим. Бироқ ўйиндан кейин аралаш эмоциялар қуршовида қолдим.
Мағлубиятдан сўнг кийиниш хонасига кирасан ва бир йигит барчадан кечирим сўраётганини кўрасан. Бироқ сен уни эшитмайсан! Ундан буткул кўнглинг қолган. Унинг узрини эшитишни ва у билан суҳбатлашишни хоҳламайсан. Ўшанда бунинг учун қулай палла эмас эди. Мен ҳожатхонага бордим ва ўн дақиқа ичида 250 дона сигаретни чекиб тугатдим. Шу тариқа ўзимни панага олдим.
Биз деярли икки йил гаплашмадик. 2008 йилги Европа чемпионатидан кейин тўйим бўлди. Турмуш ўртоғим уни таклиф қилишимни сўради. Зиданга қўнғироқ қилдим, у тўйга етиб келолмади, бироқ эртаси куни у билан кўришдик. Биргаликда тушлик қилиб, ёқимли суҳбат қурдик ва ҳаёт яна қайтадан бошланди», — дейди Саньол.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)