Асли ўзбекистонлик бўлган Американинг Immix BioPharma Inc. компанияси раҳбарлари коронавирусга қарши дори яратиб, уни ишлаб чиқариш ва тарқатиш учун ёрдам сўраб Алишер Усмоновга мурожаат йўллади, деб хабар беради «Gazeta.ru».

Фото: DW

Аввалроқ Алишер Усмонов коронавирусга қарши кураш учун Ўзбекистонга 20 миллион доллар ажратиб, вакцина қайси давлатда яратилишидан қатъи назар уни мамлакатга олиб келишга ваъда берганди.

Мактубда таъкидланишича, Immix BioPharma Inc. Американинг MannKind фармацевтика компанияси билан биргаликда қуруқ кукун шаклидаги дорини тайёрлашни бошлаб юборган. Ушбу кукун коронавирус оқибатида юзага келадиган ўткир респиратор касалликларини бартараф этишга мўлжалланган ингаляторнинг асосий компоненти ҳисобланади.

Шунингдек, компания бурунга сепиладиган спрей, ингалятор ва ички инекциялардан фойдаланиб коронавирус инфекцияси тарқалишининг олдини олиш бўйича инновацион усулларни таклиф этмоқда.

Мунтазам эволюция ва ўзгаришларга учрайдиган патогенларга (грипп каби) қарши анъанавий вакцина ишлаб чиқариш ўрнига Immix BioPharma Inc. компанияси бир нечта нафас олиш патогенлари учун универсал бўлган, хавфсиз ва ишончли платформани яратди. У хавфни камайтириш, инфекцияларнинг олдини олиш, оғир белгиларни чеклаш, жиддий белгиларни даволашга мўлжалланган.

Мавзуга доир: Коронавирус вакцинаси қачон тайёр бўлади? Ўзбекистонлик тадқиқотчи тушунтиради

«Ўзбекистон коронавирус тарқалишини тўхтатиш ва уни ташқи бозорга экспорт қилиш йўлида Immix BioPharma Inc. компанияси билан ҳамкорликда ушбу ноёб инновацион дори воситалари ишлаб чиқаришни буюртма қилиш имкониятига эга. Бу эса ўз навбатида, республикани жаҳон биотехнология саноатининг олд қаторларига олиб чиқади», — дейди дори ихтирочилари.

Immix’нинг фикрига кўра, ҳамкорликдаги биринчи қадам — коронавирус билан оғриган беморларни даволашни бошлаш, чунки биринчи дозадан кейиноқ беморларнинг аҳволи сезиларли даражада яхшиланиши кутилмоқда. Ўзбекистонлик шифокорлар дунёда биринчи бўлиб Австралия ва Америкадаги клиник синовларда саратон касаллигининг тўртинчи босқичини даволашда ишлатиладиган дориларни коронавирус билан оғриган беморларни даволашда ишлатиб кўриш имкониятига эга бўлади.

Мавзуга доир: COVID-19 коронавирусининг вакциналари қайси давлатларда ишлаб чиқилмоқда ва қачон пайдо бўлади?

Аввалроқ ЖССТ раҳбари коронавирусга қарши вакцина ишлаб чиқиш жараёни жадаллашганини маълум қилганди. Шунингдек, Пентагон коронавирусга қарши вакцинани синовдан ўтказишга киришгани, футбол юлдузлари Дрогба ва Это’O коронавирусга қарши вакцинани Африкада синаб кўришни тавсия қилганларни танқид қилгани, Johnson & Johnson компанияси 2020 йилнинг сентябрида коронавирусга қарши вакцинанинг одамлардаги синовини бошлаши ҳақида хабарлар берилган.