Тошкентда профилактика инспекторининг погонини юлиб, хизмат кийимини йиртиб ташлаган 27 ёшли аёлга нисбатан жиноий иш қўзғатилгани ҳақида хабар берилган эди. Олий суд матбуот хизмати раҳбари Азиз Обидовнинг «Дарё»га маълум қилишича, унга нисбатан уй қамоғи тарзидаги эҳтиёт чораси қўлланилди.
Дастлабки тергов давомида тўпланган ҳужжатларга кўра, 27 ёшли П.П. 2 апрель куни соат 12:30 ларда Яккасарой тумани Шота Руставели кўчасида республикада коронавирус инфекцияси тарқалишига қарши жорий этилган карантин қоидаларини бузганлиги сабабли Яккасарой тумани Ички ишлар органлари фаолиятини мувофиқлаштириш бошқармаси (ИИО ФМБ) ҳуқуқбузарликлар профилактикаси бўлими инспектори Ф. Иброҳимов томонидан тўхтатилган.
Аёл инспекторнинг жамоат жойларида ниқобсиз юриш мумкин эмаслиги юзасидан берган оғзаки танбеҳига ва ниқоб тақиши ҳақидаги қонуний талабларига бўйсунмасдан ўз йўлида давом этган. Шу сабабли уни ИИО ФМБга олиб бориш ва содир этилган ҳуқуқбузарлик учун тегишли ҳужжатларни расмийлаштириш чоралари кўрилган.
Шунда аёл инспектор Ф. Иброҳимовнинг қонуний фаолиятига фаол қаршилик қилиб, унга тан жароҳати етказиб, хизмат кийими ва алоқа воситаларига шикаст етказган. ИИО ФМБга олиб келинганда ҳам ўз ҳаракатларини давом эттириб Ф. Иброҳимов ва бошқа ҳуқуқни муҳофаза қилувчи орган ходимларини ҳақоратлаб, қўли билан уларни уриб, ҳужжатларни расмийлаштиришга йўл бермасдан бўлимдан чиқариб юборишни талаб қилган.
Мавзуга доир: Тошкентда ички ишлар органларининг карантинда олиб бораётган ишларини масхара қилган блогер 7 суткага қамалди
Қайд этилишича, суд унга нисбатан уй қамоғи тарзидаги эҳтиёт чорасини қўллаш масаласини ҳал этишда унинг тергов ҳаракатларини холисона олиб борилишига тўсқинлик қилиб, гувоҳларни кўндиришга уриниши мумкинлигини, коронавирус инфекцияси тарқалишини олдини олиш учун жорий этилган карантин ҳолатини инобатга олиб, унга нисбатан уй қамоғи тарзидаги эҳтиёт чорасини қўллашни лозим топди.
Эслатиб ўтамиз, Президент Шавкат Мирзиёев томонидан эпидемияга қарши кураш қоидаларини бузганда жавобгарлик кучайиши тўғрисидаги қонун имзоланди. Қонунга кўра, карантин қоидаларини бузганлик учун жазо кучайтирилди ва жарималар миқдори бир неча баробарга оширилди. 25 мартдан бошлаб жамоат жойларида ниқобсиз юриш тақиқланди. Ниқобсиз юрган шахслар жаримага тортилади.
Аввалроқ Тошкент шаҳридаги Амир Темур хиёбонида ниқобсиз юриб, Амир Темур ҳайкалидан коронавирус Ўзбекистондан қачон кетишини сўраган бир қиз ва икки йигит 15 суткага қамалгани, шунингдек, Сирдарёда карантин қоидаларини бузиб, ички ишлар ходимларини ҳақорат қилган фуқаро ҳам 15 суткага қамалгани хабар берилган эди.
Изоҳ (0)