Хориждан ватанга қайтишни истамаган Ўзбекистон фуқаролари фуқароликдан маҳрум этилиши ҳақидаги хабарлар рад этилди

Ижтимоий тармоқларда Ўзбекистон Президенти 31 март куни йиғилиш ўтказгани ва хориждаги барча фуқароларни 10 апрелга қадар ватанга қайтариш тўғрисида фармон имзолагани, ватанга қайтишни истамаганлар Ўзбекистон фуқаролигидан маҳрум қилиниши ҳақида хабарлар тарқалди. Ўзбекистон Ташқи ишлар вазирлиги мазкур хабарларга муносабат билдириб, уларни рад этди.

Маълум қилинишича, Ташқи ишлар вазирлигига Ўзбекистоннинг хориждаги, айниқса, қўшни мамлакатлардаги дипломатик ваколатхоналарига ҳам шу мавзуда кўплаб мурожаатлар келиб тушмоқда.

Вазирлик томонидан қайд этилишича, давлат раҳбари, ҳукумат, Республика махсус комиссияси томонидан фуқароларнинг кундалик ҳаёти билан боғлиқ барча муҳим сиёсий, иқтисодий ва ижтимоий масалалар бўйича қабул қилинган қарорлар жамоатчиликка расмий ахборот ресурслари орқали етказилади.

«Ушбу хабар эса ҳеч бир расмий манбаларда эълон қилинмагани сабабли ҳақиқатга тўғри келмаслигини маълум қиламиз», — дейилади ТИВ хабарида. Шунингдек, вазирлик фуқаролардан асоссиз хабарларни тарқатмасликни, ижтимоий тармоқлардаги бирор маълумотни бўлишишдан олдин уни расмий манбалар орқали текшириб кўришни сўраган.

Аввалроқ Ташқи ишлар вазирлиги вакили хорижий давлатларда коронавирусга чалинган Ўзбекистон фуқароларининг сонини маълум қилган ҳамда ватанга қайтиш истагидаги фуқароларнинг янги рўйхати тузилаётганини айтган эди.