Ўзбекистонда 7 апрель соат 23:00 ҳолатига кўра, 61 666 нафар шахс коронавирусга қарши тест топширган. Бу ҳақда Вазирлар Маҳкамаси ҳузуридаги санитария-эпидемиология назорати давлат инспекцияси бошлиғи Нурмат Отабеков АОКАда бўлиб ўтган брифингда маълум қилди. Унинг қўшимча қилишича, лаборатория текширувлари Ўзбекистоннинг барча ҳудудларида ўтказилмоқда.
Нурмат Отабеков 8 апрель куни соат 10:00 да «Ўзбекистон 24» телеканали орқали қилган чиқишида ҳам коронавирусга қарши лаборатория текширувлари миқдорига тўхталиб ўтган эди. Унинг сўзларига кўра, «куни кеча бир куннинг ўзида коронавирус инфекциясига 5,8 мингдан кўпроқ таҳлиллар ўтказилган. Мана шу ўтказилган таҳлиллар натижасида 0,87 фоиз ҳолатда касаллик аниқланган».
«Бундан кўриниб турибдики, касаллик аниқланиши умумий текширишлар сонига нисбатан юқори фоизни ташкил этаётгани йўқ. Лекин мутлақ сонда касаллик ортиб бораётганининг асосий сабаби — биз карантин муддатини ўтаётган одамлар орасида текширишни кўпроқ амалга оширяпмиз», — деб таъкидлаган эди давлат бош санитария инспектори «Ўзбекистон 24»даги чиқишида.
Сўнгги кунларда Ўзбекистонда коронавирусга чалинган беморлар сони сезиларли ошиб бормоқда. 3 апрель куни 22 кишида касаллик аниқланган бўлса, 4 апрель куни 39 киши, 5 апрель куни 76 киши, 6 апрель куни эса 115 киши касалликка чалингани маълум қилинди (бу — кунлик рекорд). 7 апрель куни аниқланган беморлар сони 63 нафарни ташкил этди.
Расмийлар, хусусан, Ўзбекистон соғлиқни сақлаш вазири Алишер Шодмонов бундан аввал ҳам касалланганлар сони тест ўтказиш қамровининг ошгани билан боғлиқлигини маълум қилган эди. Олдинроқ Ўзбекистонга 245 мингта тест олиб келингани ҳақида хабар берилган эди.
Ўзбекистонда 8 апрель соат 10:00 ҳолатига кўра, коронавирусга чалинганлар сони 534 нафарни ташкил этди; беморларнинг 30 нафари соғайган, уч нафари вафот этган. Сўнгги маълумотларга кўра, Тошкентда даволанаётган беморлардан 10 нафари оғир аҳволда. Бундан ташқари, хорижда камида 23 ўзбекистонлик коронавирусга чалинган, уларнинг уч нафари вафот этган.
Изоҳ (0)