Бухоро вилоятида коронавирусга чалинганлар сони 6 апрель соат 10:00 дан 7 апрель соат 15:00 га қадар — 29 соат ичида — 65 нафарга кўпайди, Қорақалпоғистонда эса худди шу вақт ичида касалланганлар сони саккиз баробарга ошди. Соғлиқни сақлаш вазирлиги эълон қилган рақамлар шундан далолат бермоқда.
Вазирлик коронавирусга чалинган 390 нафар беморнинг даволанаётган жойи бўйича 6 апрель куни эълон қилган ахборотида беморлар сони бўйича Тошкентдан кейинги ўринлардан Фарғона (64 нафар), Андижон (61 нафар) ва Наманган (48 нафар) вилоятлари бораётган эди.
7 апрель куни беморлар сони 504 нафар етганидан сўнг берилган ахборотда беморлар сони бўйича Тошкентдан кейинги энг юқори кўрсаткич Бухорода экани маълум бўлди — 84 нафар; ваҳоланки, бир сутка аввал вилоятда беморлар сони тўрт баробар камроқ — 19 нафар эди.
Шунингдек, Қорақалпоғистон Республикасида ҳам беморлар сони 29 соат ичида 2 нафардан 16 нафарга (саккиз баробарга) кўпайган. Қайд этиш жоиз, 7 апрель соат 14:30 ҳолатига кўра Қорақалпоғистонда касалланганлар сони 11 нафар бўлган, уларнинг саккиз нафари (олти нафари хотин-қизлар)га вирус Қорақалпоғистонда аниқланган биринчи бемор (эркак)дан юққан.
Бухорода касалланганлар сони бирдан ошиб кетгани юзасидан Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков 8 апрель куни Ахборот ва оммавий коммуникациялар агентлигида ташкил этилган брифингда тўхталиб ўтди.
Бухоро вилоятига учта давлатдан ҳамюртларимиз олиб келинган. Туркиядан олиб келинган 239 нафар фуқаро Истанбул аэропортида саккиз соат битта хонада ҳеч қандай ҳимоя воситаларисиз қолиб кетган. У ердаги одамларимиз ўз ҳимоясини эсдан чиқариб қўйган, касалликнинг юқишига уларнинг ўзи шароит яратган. Натижада дастлабки текширишлар вақтида уларнинг 66 нафарида коронавирус касаллиги аниқланган.Маълумот учун, Ўзбекистонда 8 апрель соат 10:00 ҳолатига кўра коронавирусга чалинган беморлар сони 534 нафарга етди, уларнинг 30 нафари соғайган, уч нафари вафот этган. Хорижда эса камида 23 ўзбекистонликда коронавирус аниқланган, уларнинг уч нафари вафот этган.Бундан ташқари, Бухорога Россиядан иккита рейсда 530 нафар фуқаромиз олиб келинган. Улар орасида ҳам коронавирус касаллигига чалинганлар бор. Эътибор берадиган бўлсак, улар икки кундан беш кунгача ҳеч қанақа ҳимоя воситаларисиз, бемалол бир-бири билан мулоқот қилиб, битта жойда яшаган. Улар ўз ҳимояси ҳақида ўйламагани, эпидемик ҳудуддалигини англаб етмагани мана шу ҳолатнинг юзага келишига сабаб бўлган.
Бу одамлар орасида коронавирус касаллигига чалинганларни аниқлаяпмиз. Бир нарсани яна бир бор эътиборингизга етказмоқчимиз — коронавирус касаллигига 14 кун карантин белгиланган. 14 кунлик кузатув давомида биринчи кунда ҳам, 14-кунда ҳам коронавирус касаллиги аниқланиши мумкин. Шунинг учун 14 кун ўтгач, карантин тадбирлари бекор қилинади.
Нурмат Отабеков, Ўзбекистон давлат бош санитария инспектори
Изоҳ (0)