Россияда маҳсулотларнинг нархи 20 фоизгача ўсиши мумкинлиги маълум қилинди

Россия савдо тармоқларида маҳсулотларнинг нархи 15-20 фоизга ўсиши мумкин. Бу ҳақда «Руспродсоюз» ижрочи директори Дмитрий Востриковга таяниб, «РИА Новости» хабар берди.

Қайд этилишича, нархларнинг ошиши яқин икки ҳафта ичида, коронавирус пандемияси ва валюта курслари тебраниши фонида йирик етказиб берувчиларнинг харид нархларини қайта кўриб чиқиши сабабли юз бериши мумкин.

Хусусан, импорт қилинадиган чой, кофе, какао ва бир қатор консерваланган маҳсулотларнинг нархи доллар курсига бевосита боғлиқлиги сабабли улар 20 фоизга қимматлашиши мумкин. Макарон маҳсулотларининг нархи 5-15 фоизга ошиши мумкин. Ташувчи компанияларнинг харажатлари ошиши сабабли нон ва бошқа маҳсулотларнинг нархи ошиши ҳам кутилмоқда.

Востриковнинг сўзларига кўра, ишлаб чиқарувчилар савдо тармоқларини ўзгаришлар ҳақида огоҳлантирган ҳамда нархларни бирданига эмас, балки икки босқичда оширишни таклиф қилган. Унинг қайд этишича, монополияга қарши кураш бўйича федерал хизмат етказиб берувчиларнинг таклифларини ўрганиб чиққан, шунинг учун уларни спекулятив деб баҳолаб бўлмайди.

Аввалроқ Алишер Усмоновнинг компанияси Россияда коронавирусга қарши кураш учун 2 миллиард рубль ажратиши ҳақида хабар берилган эди.