Сирдарё ва Нурафшон туманлари ҳоким ўринбосарлари дарахтларни ноқонуний кесишга буйруқ берди

Сирдарё туман ҳоким ўринбосари буйруғи билан «Шоликор» маҳалласидаги 1 туп арча ҳамда 1 туп қайрағоч кесиб ташлангани юзасидан вилоят назорат инспекцияси томонидан ўрганиш тадбирлари ўтказилди. Бу ҳақда Экология ва атроф муҳитни муҳофаза қилиш давлат қўмитаси хабар берди.

Ўрганиш тадбирлари давомида 1 туп арча ва 1 туп қайрағоч дарахтлари таг қисмидан кесилгани аниқланган. Дарахтларни кесиш ишлари давом этаётган пайтда иш инспекция ходимлари томонидан тўхтатиб қолинган.

«Ходимларимиз томонидан дарахт кесиш ишларини олиб бораётган фуқаролардан бунга рухсат берувчи тегишли ҳужжатлар сўралганда, улар қўлида ҳеч қандай ҳужжати йўқлиги ва бу топшириқ ‘тепадан’, яъни туман ҳокими ўринбосаридан бўлганини айтишди.

Ҳолат бўйича ‘Шоликор’ МФЙ раиси Расулжон Абдураимовнинг ҳам кўрсатмаси олинди. Унга кўра, маҳалла раиси Худойберди Нажмуллаевга ҳудудда дарахт кесиш мумкин эмаслигини кўп бора тушунтиришга уринган, аммо ҳоким ўринбосари унга ‘ким келса, ўзим жавоб бераман’, қабилида жавоб берган», — дейилади хабарда.

Сирдарё вилояти Экология ва атроф-муҳитни муҳофаза қилиш бошқармаси назорат инспекция ходимлари томонидан туман ҳоким ўринбосари Худойберди Нажмуллаевга нисбатан «Табиатни муҳофаза қилиш тўғрисида»ги қонун талабларига мувофиқ табиатга етказилган зарар миқдори 11 707 500 сўм ҳисобланди. Тўпланган ҳужжатлар 6 апрель куни ҳуқуқни муҳофаза қилиш органларига тақдим қилинган.

Шунингдек, Тошкент вилояти Нурафшон шаҳар ҳокимининг қурилиш ишлари бўйича ўринбосари Бунёд Саидхўжаевнинг буйруғи билан шаҳардаги «Бегалтепа» маҳалла ҳудудида 10 туп дарахт кесиб ташланган.

Давлат экология қўмитаси маҳалла ҳудудида 9 туп арча ва 1 туп чинор дарахтлари таг қисмидан кесилган ҳамда 1 туп чинор дарахти ўсишдан тўхташ даражасигача шикастлантирилгани аниқланган.

«Кўрсатилган манзилда дарахтларни кесиш ишларини олиб бораётган фуқаролардан бунга рухсат берувчи тегишли ҳужжатлар сўралганда, улар қўлида ҳеч қандай ҳужжати йўқлиги ва дарахтларни кесиш учун Нурафшон шаҳар ҳокимининг қурилиш ишлари бўйича ўринбосаридан топшириқ бўлганини маълум қилган.

Шундан сўнг ўзини Нурафшон шаҳар ҳокимининг қурилиш ишлари бўйича ўринбосари Бунёд деб таништирган шахс келиб, маҳалла ҳудудида йўл қурилиш ишлари олиб борилаётгани ва шу муносабат билан дарахтларни кесиш ишлари бошлаганини айтган», — дейилади хабарда.

У ўз сўзида, шунингдек, дарахт кесиш учун «Ягона дарча»дан рухсат олинганини ҳам қўшимча қилган. Ҳолат бўйича ҳоким ўринбосаридан ёзма равишда тушунтириш сўралганда, уни беришдан бош тортган ва дарахт кесиш ишларини олиб бораётган шахсларни ҳам тарқатиб юборган.

Маълум бўлишича, ушбу ҳолатда табиатга етказилган зарар миқдори 109 миллион 270 000 сўмни ташкил қилган. Ҳозирда тўпланган ҳужжатлар ҳуқуқни муҳофаза қилиш органларига тақдим этиш учун тайёрланмоқда.

Бундан ташқари, Элликқалъа туман инспекцияси томонидан ўтказилган рейд тадбири давомида Элликқалъа тумани Бўстон шаҳрида яшовчи фуқаро Н.М. томонидан ноқонуний равишда 6 туб оқ терак кесилганлиги аниқланди.

Ҳолат юзасидан ҳуқуқбузар фуқарога нисбатан тегишли ҳужжатлар расмийлаштирилиб, Маъмурий жавобгарлик тўғрисидаги кодекснинг 79-моддаси 1-қисми (Дарахтлар, буталар, бошқа ўрмон ўсимликлари ва ниҳолларни ғайриқонуний равишда кесиш, шикастлантириш ёки йўқ қилиш)га асосан 1 115 000 сўм жарима ва табиатга етказилган зарарни қоплаш учун 2 876 700 сўм даъво белгиланди.