Тошкент вилоятининг Чирчиқ шаҳридаги тўйхона тиббий ниқоблар ишлаб чиқарадиган яширин цехга айлантирилгани аниқланди. Бу ҳақда Давлат солиқ қўмитаси матбуот хизмати хабар бермоқда.
Қайд этилишича, Чирчиқда жойлашган «Азия» тўйхонасида Фарғона вилоятининг Қўқон шаҳрида рўйхатда турувчи 31 ёшли М.Э. ҳеч қандай ҳужжатларсиз тиббий ниқоб ишлаб чиқаришни йўлга қўйган.
У фаолиятини 2 апрелда бошлаган бўлиб, ноқонуний равишда 183 нафар ишчи ёллаган ва улар билан оғзаки равишда, ҳар бир ниқоб учун 60 сўмдан иш хақи беришга келишган. Бу ерда тайёрланаётган маҳсулотларнинг сифати ва белгиланган санитария талабларига қанчалик жавоб бериши ҳеч кимни қизиқтирмаган.
Чирчиқ шаҳар давлат солиқ инспекцияси ходимлари томонидан 4 апрель куни бино кўздан кечирилганда 131 973 дона тайёр тиббий ниқоб, 170 000 дона ярим тайёр маҳсулот ва 21 дона клейлаш ускунаси, жами 301 994 дона, умумий нархи 156 миллион 696 минг сўмлик товар моддий бойликлар борлиги аниқланган.
Назорат тадбири натижасида тегишли ҳужжатлар расмийлаштирилиб, ҳуқуқбузарлик ашёлари масала қонуний ҳал бўлгунга қадар вақтинчалик олиб қўйилган.
Изоҳ (0)