Тошкентнинг Олмазор туманида Миллий гвардия ходимлари каналда чўкиб кетаётган аёлни қутқариб қолди. Бу ҳақда Миллий гвардия матбуот хизмати хабар бермоқда.
Маълум бўлишича, 7 апрель куни соат 09:45 ларда туманнинг Қорасарой кўчасидан оқиб ўтувчи Қичқириқ канали атрофида хизмат олиб бораётган Миллий гвардия қўриқлаш хизмати ходимларини нотаниш йўловчи тўхтатиб, каналда одам чўкаётганлигини айтган.
Ходимлар тезкорлик билан кўрсатилган манзилга етиб борган ва барча хавфсизлик чораларини кўрган ҳолда канал бўйидаги дарахтга тирмашиб турган аёлни арқон ёрдамида тортиб олиб, биринчи ёрдам кўрсатган. Аёл Олмазор туманида жойлашган 6-сонли ИИБга етказилган. У ерда фуқарога шифокорлар томонидан тиббий ёрдам кўрсатилиб, масъул психолог ходими суҳбат ўтказган.
Ҳозирда ҳолат юзасидан текширув ишлари олиб борилмоқда.
Аввалроқ Тошкентда Миллий гвардия хизматчилари Анҳор каналида чўкаётган аёлни қутқаргани, Наманганда чўкаётган аёлни қутқарган миллий гвардия ходимининг ўзи сувда бедарак йўқолгани ҳақида хабар берилган эди.
Изоҳ (0)